يووووووم في الأستاد..!

[نوني]

يوم في الأستاد..!

تجلس أمل في غرفتها يدها على خدها. يلتف حولها الحزن والأسى، مرددين ياليل ماأطولك ..!
ومن خارج الغرفة يمر سعيدان ويسمع صوت من غرفة أمل ..!
يطق الباب ماردت عليه ........ يدخل عليها في الغرفة ويلقاها تحاكي نفسها ...!
سعيدان: ياربي أختي انهبلت مالومها الفراغ ضيع ناس...
يقرب منها ويحط يده على جبينها بيشوف حرارتها خاف انها مهلوسه.... وتصرخ ذيك الصرخة اللي خلته يدور على الباب مايدري وش سوى هو ضغط على زر متفجرات!... ولا وش السالفه؟
هدوء والغرفة سكون ونظرات صوب الأثنين ماتدري وش تبي!
وبعصبية تحكي أمل .....سعيدان وش جابك غرفتي
سعيدان: ابدا ياأمل كنت أبيك تكوين بدلتي عشان الحق على شغلي مابقى الا ساعه...
أمل : لا ياشيخ احد قالك ان هذا محل كوي ملابس بعدين ياخي طق الباب قبل لا تدخل الناس لها حرمات.! افرض مثلا كنت .... وش بتسوي!
سعيدان: اقول دقينا لين قلنا بس وماشفنا رد، والصوت ترى كان عالي وسمعنا بلاوي ...
أمل : احترم نفسك اي بلاوي!! حرام الواحد يخلي بنفسة شوي ، ولا لازم تذكرني اني اختك وانت اخوي وان هذا بيتنا........
سعيدان : تدرين اليوم عندنا مباراة في الاستاد ولازم احضر بدري عشان الناس اللي يحضرون
أمل : نسيت أنك رئيس الأستاد يالسكرتي، والعالم ماراح تدخل الا بوجودك، الحين ليش مايخلونا نحضر مثلكم... ترى مب صعبه بوابه لكم وبوابه لنا وقلوبنا معكم !
سعيدان : مانبي قلوبكم اعقلوا وفكونا ...
أمل : والله شيء يستاهل التفكير...!
في صباح يوم جديد الشمس مشرقة، والعصافير مغردة ( مشاركة من اللغة العربية!) تروح أمل للنادي وتشوف صاحباتها ساره وحنان وتحكي لهم
أمل : وش رايكم يابنات نروح الاستاد
سارة : ليه صار الدخول عوائل وانا مدري
أمل : وتبيني أنتظر لين يصير عوائل ...
حنان: انتي شكلك تقصدين طريق الحوامل
أمل : أنا اقصد أستاد الملك فهد ملعب مدرجات جمهور ومعكم على الهواء...
سارة: شوفي يا أمل في هبالك حنا معك بس يوصل للاستاد انتي شكلك انهبلتي
أمل : هذا الهبال اذا ماطلع مرة وحدة ماينفع
رجعت امل للبيت وخيالها الواسع صور لها الاستاد قبالها..... وتسمع صوت الجماهير على المدرجات ويزيد الاصرار والتحمس!
تدخل غرفتها ترمي أغراضها على سريرها، تشغل التلفزيون وهي ماتطالعه تسمع صوت المذيعه......... كيف ترفهي عن نفسك عزيزتي الفتاة!
تلتفت على التلفزيون وتقعد تخربط على نفسها..... حتى أنت بعد تعرف تنصح!
وتكمل المذيعة...... عزيزتي رفهي عن نفسك بطريقتك التي ترينها مناسبه لك، طالبي بما ترينه من وسائل الترفيه فنحن لانعلم ماذا تريدين!
رسخت هالكلمة في راس امل....... فنحن لانعلم ماذا تريدين !!
صح هم وش دراهم انا وش ابي وسارة وش تبي وحنان بعد ......!
بعد هالمقوله اللي سمعتها امل بدت تخطط وتتشاور مع سارة وحنان... وبدت من سعيدان تراقبه ليل نهار متى يروح ومتى يجي...... ومفتاح الاستاد قصت عليه !
سارة الحبيبة طلعت جدول الدوري من النت وعزمت بنات النت من جميع المناطق.. أما حنان وفرت الباصات اللي راح تنقلهم بسووايقها !
وش بقى؟
مابقى الا يختارون الوقت المناسب .... وكان يوم السبت تسحبت كل وحده من بيتهم بهدوء وأمل قبل لاتطلع راحت لغرفة سعيدان تودعه وتعتذر منه لان فصله قرب... لقت شخيرة واصل لباب الشارع قالت أجل ماله داعي .........!
انطلقوا على بركة الله أمل وسارة في سيارة وحنان في الباص الأول تقود الرحلة ...
امل تقول لسارة هذا مو طريق الاستاد شكل حنان ضيعت ....وسارة تقول يابنت الحلال شلون ضيعت يمكنه طريق مختصر....
شوي وتوقف الباصات قدام مطار الملك خالد..! طار عقل أمل ونزلت على حنان في الباص وامسحي بها الارض، اخرتها المطار...!
ليموزين يمر من عندهم وبسرعه يوقفونه ويسألونه على الاستاد قال: مو هنا ماما طريق ثاني بس انتي حرمة كيف روح استاد.... بغت أمل تجرب التمارين اللي تعلمتها عليه..... بس مسكتها سارة ولحقوا الليموزين ودلهم مكان الاستاد....
كانت الساعه السابعه صباحا....... تفقدو المكان مالقوا فيه احد ، وباقي السكرتين نايمين.. امحق حراسة لو دارين جينا من زمان.......!
امل ماهي مصدقه ومفاتيح سعيدان معها...... ذكرت الله على نفسها على الأنجاز الأول في حياتها ،وفتحت باب الاستاد....... وتدافعو البنات يركضون، وعلى المدرجات يطامرون مو مصدقين.....!
تمتعت أمل في الاستاد لعبت، وركضت ،ومسكت مكروفون التعليق....... وقعدت تعلق على مباراة نسائية تعد الاولى من نوعها، ومامداهم يستمتعون الا صحى واحد من السكرتين وسمع صوت نسائي قاعد يعلق جو الاستاد طارت بوهته....! وركض للباقين يصحيهم وكبرت فجيعتهم بنات داخل الاستاد ......! قاموا يصايحون بمكبرات الصوت زي اللي يحرج على سيارة يابنات تغطوا تسترو واطلعوا بكرامتكم انتم عارفين ان الشيء هذا ممنوع !
تغطت سار وطلعت لهم وقالت: شوفوا كلام زايد مانبي حنا ماسوينا شيء غلط...! جاين نوسع صدورونا بطريقتنا وشوفت عينكم ! لا رجاجيل ولا تصوير والمكان مكشوف مو مثل الحفلات اللي خش ودس وش تبون بعد....! تشارك أمل وهي جالسه مروقه في منصة التعليق وماسكة المكرفون كانها تقول اذاعه الصباح .....ومشغله مكبرات الاستاد، وبصوت عالي ماراح نطلع لنا حق مثلنا مثلكم، وبعدين ماسمعتوا المذيعه في التلفزيون يوم قالت (طالبي بما ترينه من وسائل الترفيه فنحن لانعلم ماذا تريدين!!) :D

[مـــــلاذ]

طالبي بما ترينه من وسائل الترفيه فنحن لانعلم ماذا تريدين!!


انا اتوقع حتى أمل ماتعرف وش تبي


ولا كان ماحدها الملعب :D



هذا الفراغ .. خلى الشباب يتعلقون في ( المراوح)


مثل ما انتشر في مقاطع البلوتوث ...




الف شكر لك نعيمة السويد على هذه المشاركة


ولي عودة إن شاءالله ..



بالغ الود

[مزون المحمد]

:(


:(



ذكرتيني بالذي مضى

حلم كان يراودنا أنا وصاحباتي لين أيام الجامعة (الله يذكرها بالخير)

نجتمع في ساعات الفراغ

ويوم يكون فيه نهائي

شوفي أنواع الاستهبالات بهالموضوع بالذات

يجينا شواش على قولتهم ليه مايكون لنا مدرجات خاصة :cool:

مثلاً الفروسية فيها قسم خاص (للعائلات) <<< كأنهم رايحين تمشية :D

بس أتوقع يجي واحد قريب من آل زلفه ويطالب بهالشي

ومطالبة بمزاولة الكرة لإن نساء السعودية كثرت بينهم السمنة لعدم مزاولتهم

الأنشطة الرياضية :rolleyes:

وبعد ذلك مطالبة بتشكيل المنتخب السعودي للسيدات ويكون هناك شرط :

اللعب بالبراقع :eek:

الله حلو تمثيل الوطن وحمل الشعار الأخضر في المحافل الدولية







حلم .. بطعم الملح .... :)




نعيمة السويد

قرأت حروفك بأحلام واقعية

لاتحرمينا مداد قلمك


بإنتظار نزفك


دمتِ بود

[الجـــــوهره]

غاليتي نعيمه


تسلمييييييييييييين الله يسعد أيامك


أنا عن نفسي ما أحب الكوره ولا المباريات بس من جد حمستيني أدخل الملعب ( عشت الدور شوي ) :D

(طالبي بما ترينه من وسائل الترفيه فنحن لانعلم ماذا تريدين!!)

نقول إيه والا إيه إييييييييييييييييه الله لنا :(

لك ودي و محبتي

[إيمان السعيد]

رائعه اختى نعيمه

ترى انا ما اطالب بأى

شيئ من هذا

اولا عندنا الاستاد للجميع

بس انا ما احب اذهب اليه

ولا عمرى ذهبت اليه


يمكن اجد هنا ان فعلا

نظرية الممنوع مرغوب

فيها شيئ قوى من الصحة

هى رغبت تروح الاستاد

لانه ممنوع انما لو كان مثلنا

مو ممنوع ما كان رغبت فيه مثلى

لكى الود والتقدير اختى


نغم

[محمد الفرحان]

.

.

يوم في الأستاد..!

مقال سبق ان تشرفت بقرائته في مجلة

بروز بقلمكِ كاتبتنا المميزة

نعيمة السويد . .

وحتما" سيكون لي عودة ان شاء الله

.

.

دمتِ ودام حضوركِ المختلف

.

.

تقبلي فائق تقديري واحترامي

[ضوى قطر]

http://aljori.jeeran.com/s1.gif

الله يهداكم بس بنات وكوره ما تصير ^_^

اي والله فنحن لا نعلم ما تريدين ^_^

بالله من اللي يدري ما يريد.. انا عن نفسي لحد الحين ما عرفت ^_^

بس الكوره والبنات تناقض كبير .. مادري وش تبون بشد الاعصاب ^_^

اعتقد ان الترفيه مفقود بالنسبه للبنات والشباب ^_^

وبالتالي النتيجه= فراغ+ملل+نوم+نت ^_^

بس بعض الاحيان ما تقدرون هالفراغ وتحتاجون له؟

انا اشوف انه احيانا يفيد ما يضر .. حلو الواحد يكون ما يعرف وش يبي ^_^

تحياتي لج عالموضوع الحلو والسرد الاحلى..

http://aljori.jeeran.com/s2.gif

[فهد الدباسي]

موضوع طريف بـ الفعل



و إن حصل المكتوب أعلاه


سـ تتحول المتعة إلى مصائب بـ التأكيد :D



تقبلي تحياتي