المساعد الشخصي الرقمي

مشاهدة النسخة كاملة : ثلاثيات ورباعيات سامح الشبة

سامح عبد البديع الشبة
15-07-2006, 01:13 AM
( 1 )
خليك ع الأرض ماشى
وأوعى تطلع فوق
ازعق وقول ماشى
واتكلم برضه بذوق
دا أنت ع الأرض ماشى
وبكره تطلع فوق
******
سامح عبد البديع الشبة
15-07-2006, 01:16 AM
( 2 )
سافرت مع موجة زرقة فى حضن البحر
حدفتنى فى موجة تانية مالهاش بر
لاقيت نفسى فى دوامة بتجر
لا أنا فيها حزين ولا بتسر

*****
سامح عبد البديع الشبة
15-07-2006, 01:18 AM
( 3 )
حبست نفسى فى زنزانة
ملهاش آخر
لافيها حد بيتكلم
ولا حد بيقول اتاخر
وأدى دنيتى أنا وحدى
أنا المسحور فيها
وأنا الساحر
دنيا صغيرة على قدى
بعيدة عن العالم الساخر
*****
سامح عبد البديع الشبة
15-07-2006, 01:38 AM
( 4 )

قلت أعمل حساب للزمن وأوفر
وأحط القرش ع القرش يكتر
يمكن بنت الحلال تقدر تصبر
لما البيت الصغير يكبر
*****
سامح عبد البديع الشبة
15-07-2006, 01:39 AM
( 5 )

علمونا إزاى نكتب الحروف
وإزاى نواجه كل خوف
ولما جات فرصة المواجهة
تعالى معانا اتفرج وشوف
*****
سامح عبد البديع الشبة
15-07-2006, 01:40 AM
( 6 )

يا عينى ع الولد اللى صوته اتنبح
وراح فيها لمـا شـاف الشــبح
بيقرب منه ويقطع كل الصحـف
ويوشوش ف ودنه كان غيرك فلح
*****
سامح عبد البديع الشبة
15-07-2006, 01:41 AM
( 7 )

زمان هتفنا بأعلى صوت
يا إما النصر .. يا إما الموت
ومرت أيام .. وجات أيام
والخوف جوانا ما له صوت
*****
سامح عبد البديع الشبة
15-07-2006, 01:42 AM
( 8 )

قلت أعمل لنفسى تابوت
قبل ما تمر الأيام وتفوت
ما احنا فى زمن يا بنى
ما تعرف له حياة من موت
*****
سامح عبد البديع الشبة
15-07-2006, 01:43 AM
( 9 )

قيس وليلى اتولدوا من جديد
واختلت الحكاية وخلفوا سعيد
تعالى واسمع من عمك قيس
إيه اللى جراله وإزاى بقى شريد
*****
سامح عبد البديع الشبة
15-07-2006, 01:44 AM
( 10 )

سلمت ف مرة على حوت
ماشى ع الأرض معاه " ريموت "
شتمته وضربته فى خيالى
وورايا ساكن جسدى فى تابوت
*****
سامح عبد البديع الشبة
15-07-2006, 01:46 AM
( 11 )

قول للحمار يا حمار شى هايمشى
وقول يا بنى آدم إمشى ما يمشى
مهما ضربته بالعصا والسوط
اللى ف دماغه ف دماغه هايمشى
*****
إيمان السعيد
15-07-2006, 02:04 AM
سامح

رباعيات جميلة

فكرتنى بصلاح جاهين

وانا كتبت حاجة صغيرة

بعد التمام ابتسم بعد الظلام فقنا

شفت جمال طلعته من همنا فقنا

بيطل فوق أرضنا ساخر ومتبسم

دنيا بتلعب بينا شغلانة فى سوقنا



رائع يا سامح

دمت بكل ود

نغم
سامح عبد البديع الشبة
15-07-2006, 02:43 PM
سامح

رباعيات جميلة

فكرتنى بصلاح جاهين

وانا كتبت حاجة صغيرة

بعد التمام ابتسم بعد الظلام فقنا

شفت جمال طلعته من همنا فقنا

بيطل فوق أرضنا ساخر ومتبسم

دنيا بتلعب بينا شغلانة فى سوقنا



رائع يا سامح

دمت بكل ود

نغم

النغم المتناغم / نغم

رائعة أنتِ فى كل نوع أدبى ، وسررت جداً حينما طالعتنى برباعية جميلة ورقيقة .

تقبلى تحياتى وتقديرى
سامح عبد البديع الشبة
15-07-2006, 02:54 PM
( 12 )

الدنيا سجن كبير وعجيب
فيه الحبيب فى ضل حبيب
لو غابت فيه يوم الشمس
ما تعرف قريب من غريب
*****
سامح عبد البديع الشبة
15-07-2006, 02:55 PM
( 13 )

قمت أصلى الفجر لله
وأدعى ع اللى ربنا نساه
يارب خد بإيد الظالم
وعلى جهنم .. ما تسمع نداه
*****
سامح عبد البديع الشبة
15-07-2006, 02:57 PM
( 14 )

الدنيا بنت حلوة مؤدبة
لابسة طرحة بيضة منقطة
ماسكة بإيديها نار مولعة
للى يقرب منها تولعه
*****
سامح عبد البديع الشبة
15-07-2006, 02:59 PM
( 15 )

ع الفول صحينا وافطرنا
واتغدينا واتعشينا ونمنا
ورجعنا صحينا وقومنا
لقينا طبق الفول مِلازمنا
*****
سامح عبد البديع الشبة
15-07-2006, 07:54 PM
( 16 )

ألمح فى عيون الناس كلام
يجيبوا فى سيرتى كتير ما نام
أفكر ودقق فى كل نظرة
أقول دا علام مش كلام
*****
سامح عبد البديع الشبة
15-07-2006, 07:57 PM
( 17 )

غنيت للناس أغانى ومواويل
ورقص الشجر ومال النخيل
وفرح النهار وسهر الليل
ونسينا زمنا وارتضينا بالبديل
*****
سامح عبد البديع الشبة
15-07-2006, 07:58 PM
( 18 )

قلت الوطن بيتباع يا رجالة
ومافيش حاجة أغلى م الكرامة
قالوا لنا الحكاية بسيطة خالص
حبة جاز على بنزين وولاعة
*****
سامح عبد البديع الشبة
15-07-2006, 07:59 PM
( 19 )

نقطة ورا نقطة ورا نقطة
لابد فى الآخر هاتجيلك نقطة
من نقطة عيش وملح وهدمه
لنقطة كلمة توصلك للنقطة
*****
فهد الدباسي
16-07-2006, 11:11 PM
متابعٌ لـ هذا الطرح اللافت



تحياتي لك يا سامح
سامح عبد البديع الشبة
17-07-2006, 01:02 AM
متابعٌ لـ هذا الطرح اللافت



تحياتي لك يا سامح

أ / فهد الدباسى

شكراً على مرورك الكريم ومتابعتك الجميلة .

تقبل تحياتى وتقديرى
سامح عبد البديع الشبة
17-07-2006, 01:06 AM
( 20 )

قلنا عروبة وقومية
راحت دى .. جات ديه
وبقلنا على الحال دا كده
قول ألف سنه وشويه
*****
إيمان السعيد
17-07-2006, 01:06 AM
بدق دقة وراها دقة

بكل خفة وكل رقة

إصحى يانايم

قوم يا أبن مصر

الصبح فاتك والضهر فاتك

فكرت مرة تصحى مصر

أهـ يامصر

كرباج بيلهب ضهور نيام

من غير كلام من غير سلام
سامح عبد البديع الشبة
17-07-2006, 01:07 AM
( 21 )

سجنو الكلمة فى لسانى
قلت ومالو ما أنا المسجون
سلبو العقل من راسى
قلت ومالو ما أنا المجنون
سحبو البذرة من فاسى
قلت ومالو ما أنا المديون
حبيت اتكلم واعقلها واتوكل
مالقيت نفسى إلا وأنا مدفون
*****
سامح عبد البديع الشبة
17-07-2006, 01:09 AM
( 22 )

كويس .. كويس .. كويس .. كويس
كله هنا.. كويس .. كويس
وكمان هناك .. كويس .. كويس
وفى كل حته .. كويس .. كويس
*****
سامح عبد البديع الشبة
17-07-2006, 01:11 AM
( 23 )

مال عليه صاحبى وقالى يا خايب
ماله حبل الوصال عندك كدا دايب
رديت عليه بعكازى وبشعرى الشايب
الولد مهما كبر عمره ما هيبقى شايب
*****
سامح عبد البديع الشبة
17-07-2006, 01:19 AM
بدق دقة وراها دقة

بكل خفة وكل رقة

إصحى يانايم

قوم يا أبن مصر

الصبح فاتك والضهر فاتك

فكرت مرة تصحى مصر

أهـ يامصر

كرباج بيلهب ضهور نيام

من غير كلام من غير سلام


آهـ يا / نغم ... آهـ

مليون أهـ طالعه من قلبى
وأنا قلبى ما يستحملش
لهفة فى وصال
وحرقة فى بعاد
أهـ يا قلبى
يا صاحى ومابتحلمش
سامح عبد البديع الشبة
17-07-2006, 01:22 AM
( 24 )

أيوه علمتنا الدولة ومابننكرش
وخادت بروزم الروزم وماخلتش
وزرعت فى عقولنـــا مبدأ
اللى معاه قرش يساوى قرش
*****
سامح عبد البديع الشبة
17-07-2006, 01:24 AM
( 25 )

الجهات الأصلية فى بيتنا مخرفة
فى الجنوب صورة لبنت مِدمعة
وفى الشرق عجوز بهدوم مِرقعة
وفى الشمال لولد فيه النار مولعة
*****
سامح عبد البديع الشبة
17-07-2006, 01:25 AM
( 26 )

اكتب يا أديبنا اكتب واكتب
مهما كانت تحتك الأرض
بتتشق .. اكتب واكتب
ولا كانت فوق رقبتك سكينة
بتدق .. اكتب واكتب
ليوم يغيب فيه القمر
وينشق .. اكتب واكتب
*****
سامح عبد البديع الشبة
17-07-2006, 01:27 AM
( 27 )

صنعت فى يوم عربية لعبة
بأربع عجلات وموتور شِحته
مشت العربية ببطء وبسرعة
وكان اللى سايقها الواد سِعده
*****
سامح عبد البديع الشبة
17-07-2006, 01:28 AM
( 28 )

كنا زمان أطفال شاطرين
فى الجد واللعب والحب
ولما كبرنا صبحنا خايبين
فى الحب والصدق مش نافعين
*****
سامح عبد البديع الشبة
17-07-2006, 01:30 AM
( 29 )

طقت فى دماغى فكرة وراح أعملها
أجمع أعلام بلادى واظهر معالمها
وألغى كل الحدود ويبان أصل معدنها
قبل قرارات الكراسى وكدب عاملها
*****
إيمان السعيد
17-07-2006, 01:30 AM
سامح

دوما متابعة لك انا

ويسعدنى تلك المتابعة

بكل حروفك الرائعة

نغم
جليلة ماجد
17-07-2006, 01:47 AM
فلأحجز هنا كرسياً !!

جميل أنت سامح ..حين تبوح بشكل يختلف :)

صافي مودتي .. و أنتظر !
سامح عبد البديع الشبة
17-07-2006, 09:00 PM
سامح

دوما متابعة لك انا

ويسعدنى تلك المتابعة

بكل حروفك الرائعة

نغم

يا / نغم

يسعدنى متابعتك لأعمالى القصصية ورباعياتى .

تقبلى تحياتى وتقديرى
سامح عبد البديع الشبة
17-07-2006, 09:03 PM
فلأحجز هنا كرسياً !!

جميل أنت سامح ..حين تبوح بشكل يختلف :)

صافي مودتي .. و أنتظر !

أ/ جليلة ماجد

سعيد جداً بوجودك ، وجميل حضورك بين نصى القصصى وبين رباعياتى .

وفى انتظارك دائماً

تقبلى تحياتى وتقديرى
سامح عبد البديع الشبة
17-07-2006, 09:17 PM
( 30 )

كلمة الآهـ فى لسانى بتقول آهـ وآهـ
لما تيجى تقول الآهـ آهـ وهى آهـ
ولما تيجى تقول الآهـ وهى مش آهـ
فيحسدوك على حالك ومن قولة آهـ
*****
سامح عبد البديع الشبة
18-07-2006, 01:17 AM
( 31 )

خيرونى ما بين الألوان
فاخترت أنا الأسود
قالوا لى ما له الأبيض
قولتلهم بكره يتقبل اسود
قالوا لى طب والعسل
قولتلهم أحلى مافيه الأسود
قالوا لى اتفاءل بالنهار اللى جاى
قولتلهم يا خوفى يتقلب اسود
*****
سامح عبد البديع الشبة
18-07-2006, 09:53 PM
( 32 )

كتير سألونى عنى وعنها
قلتلهم هاشيل همى وهمها
جيت أدور على همى
صعب عليه همها
*****
سامح عبد البديع الشبة
18-07-2006, 10:03 PM
( 33 )

يا لى الكورة دايماً فى ملعبك
وعمرها ما طلعت بره آوت
سنتر وباصى وشوت إيه يمنعك
دا عمرك ما جالك أبداً آوت
فن الكلام المزوق دا لعبتك
واحنا اللى دايماً فى الآوت
*****
سامح عبد البديع الشبة
19-07-2006, 01:19 AM
( 34 )

ملكت فى ساعة واحدة العالم فى إيديه
لاقيته حته واحدة من طينه وشوية ميه
وصبح فى ساعة تانية مش ف إيديه
حبة تراب رماهم الهوا ف عنيه
*****
سامح عبد البديع الشبة
20-07-2006, 12:11 AM
( 35 )

حط على شباك بيتنا حمام جم
مكسور الجناح وبينزف دم
سال ع الحيطان وصبحنا ف هم
وجه علينا الليل بجرح ما يتلم
*****
سامح عبد البديع الشبة
20-07-2006, 11:23 PM
( 36 )
عديت على بحر الهوا
وفردت أنا دراعى
شدنى بحر الهوا
قلت يا دراعى
سألت عن جنيته
فردت مافيش داعى
وابعد عن سكته
دا الغدر فيه راعى
*****
سامح عبد البديع الشبة
21-07-2006, 12:44 PM
( 37 )

قلبى قايد فيه النار
للى بيحصل ف الدار
قالوا نبنى أقوى جدار
صرخت لأهـ .. هاضرب بالنار
*****
سامح عبد البديع الشبة
21-07-2006, 12:45 PM
( 38 )

شفت ألوان كتير متلونة ع الخدود
الأبيض لون الفل والأحمر لون الورود
بس عمرى ما شفت ألوان كتيرة قوى
إلا على جناحين الحمام وع الحدود
*****
سامح عبد البديع الشبة
22-07-2006, 01:34 AM
( 39 )

الأستاذ الكبير قاعد على مكتب
جاله الفراش ومعاه واحد سحلب
مرة يشطب والتانية يشرب
قال إيه الأستاذ بيكتب
*****
سامح عبد البديع الشبة
22-07-2006, 01:52 AM
( 40 )
حاجة واضحة وزى الشمس
مش محتاجة نظر ولا همس
موافق ... مش موافق
الحرية دى كانت بالأمس
*****
سامح عبد البديع الشبة
22-07-2006, 01:54 AM
( 41 )
حبيتك يا حبيبتى ومش هاقدر أقولك
عشان انتى من سنى وأنا من سِنك
وبكره يجى اللى يشترى ويقدر
ويخطفك من كفى ويبعدنى عنك
*****
سامح عبد البديع الشبة
22-07-2006, 01:56 AM
( 42 )

يامه تعالى شوفى حالى
وتعالى شوفى اللى جرالى
دا كل واحد من إخوانى
رافع عَلمه وبيقول وأنا مالى
*****
سامح عبد البديع الشبة
22-07-2006, 07:32 PM
( 43 )

عشموها كتير بالحلق
وذاع النبأ ع الملأ
لا هِى فِرحة بودَنها
ولا هى دِخلت السبق
*****
سامح عبد البديع الشبة
22-07-2006, 07:37 PM
( 44 )

سألتك بتحب .. ما جوبتنيش
طب رد .. أيوه .. مافيش
رسينى .. اسكت وأحب وأعيش
ولا أصد .. وابعد عنك .. ولا جيش
*****
سامح عبد البديع الشبة
22-07-2006, 07:38 PM
( 45 )

شبابيك بيتنــا القديم كلها قديمة
ما بين الخرسانة والطوب ما هى سليمة
فكرت أشيلها بالشاكوش من مطرحها
جات ريح من الشمال بنسمة عليلة
*****
سامح عبد البديع الشبة
22-07-2006, 07:39 PM
( 46 )

تصور إن الحامل والمحمول بقوا واحد
وإن العيل والراجل كمان صبحم واحد
لما يشيل الحامل المحمول بسهولة
ويأمره الراجل بضرب العيل المارد
*****
سامح عبد البديع الشبة
23-07-2006, 03:15 PM
( 47 )

ما بين أربع حيطان بحيا وأموت كذا مرة
أنام مرة وأموت مرة وأعيش مرة ومرة
ولا عمرى فكرت فى بكره ولا اللى جاى
ولا كانت حياتى فى يوم أبداً مره
*****
سامح عبد البديع الشبة
23-07-2006, 03:21 PM
( 48 )

تيجى نبتدى صفحة جديدة
ما احنا حياتنا
يا حياتى كلها صفحات
تيجى ننهى صفحة قديمة
ما احنا كتابنا
يا حياتى فيه غلطات
تيجى تهتدى وتكونى شريكة
دا احنا حياتنا
يا حياتى كلها درجات
*****
سامح عبد البديع الشبة
23-07-2006, 03:23 PM
( 49 )

من زمان وأنا لسه بحلم
يجى بكره بألف عيد
يزرع جوانا ألف بذرة
تبدر سنابل ف كل إيد
نفرح ببكره وبعده
اللى مستنى لسه وليد
*****
سامح عبد البديع الشبة
23-07-2006, 04:11 PM
( 50 )
مش من حقى ولا من حقك
افتح بقى ولا تفتح بقك
امشى براحة وجنب الحيط
وبص ف صورتك وصورة جدك
*****
سامح عبد البديع الشبة
23-07-2006, 11:55 PM
( 51 )
عشت قصة حب وكتبت قصايد
فيها المتهنى والشقى والفريسة والصايد
فيها الشهيد والجبان والضعيف والمارد
الكل فى عذاب والكل جحود كايد
*****
محمد الفرحان
12-08-2006, 11:16 PM
.

.

إستمر ياسامح

فنحن نتابعك
سامح عبد البديع الشبة
15-10-2006, 11:38 PM
( 52 )

ما بين نفس ونفس
آدينى عايش وبتنفس
وما بين سلوك عريانة
خايف لتتلمس
بمشى وأنا ف سكتى
شايف وبخَمِس
*****
سامح عبد البديع الشبة
15-10-2006, 11:41 PM
( 53 )

كل البيبان المفتوحة اتقفلت
حتى الشبابيك المواربة اتحشمت
واتحجبت واتستت واتهننت
وف أوضه ضلمه اتربطت واتكممت
*****
سامح عبد البديع الشبة
15-10-2006, 11:51 PM
( 54 )

ريان يا عرب ريان
طلقه من ده أو ده سيان
مادام بيصيب الهدف بنجاح
يبقى يستحق أعلى وسام ونيشان
*****
سامح عبد البديع الشبة
15-10-2006, 11:52 PM
( 55 )

ضاعت منى خطوط الطول والعرض
واختفت ملامحى وأنا ع الأرض
وانعكست المراية واتبدلت الأرض
وصبحت واحد تانى بطول عرض
*****
سامح عبد البديع الشبة
15-10-2006, 11:55 PM
( 56 )

حرمونى أنطق رقم ستة بالإنجليزى
أو أبص على أى ست يا عزيزى
لأن كدا عيب وغلط ومايصحش
تقف جانبى ف الطابور الحاجة زيزى
*****
سامح عبد البديع الشبة
15-10-2006, 11:57 PM
( 57 )

دستور يا سيادنا دستور
قررت ألبس كستور
قبل ما يجى علينا الدور
وتدور بينا الساقية بأى تور
*****
سامح عبد البديع الشبة
16-10-2006, 12:01 AM
( 58 )

البنت دى أحلى بنت أنا شفتها
فى رسمها ووصفها واسمها
البنت دى مش أى بنت عرفتها
البنت دى جوه القلب نبضها
*****
سامح عبد البديع الشبة
16-10-2006, 12:03 AM
( 59 )

مين اللى دبح الديك وكال الفرخة
مين اللى دمع عنينا وموت الفرحة
مين اللى دبح ف القلوب وخِتم بالقرحة
مين اللى دمع عنيه مليانة بالفرحة
*****
سامح عبد البديع الشبة
16-10-2006, 12:06 AM
( 60 )

مليت فرجة على بعضنا البعض
وزهقت من قاعدتنا جنب بعض
لازقين لزقة ماشفتهاش على حد
كأننا هانموت وبنموت لو سبنا بعض
*****
سامح عبد البديع الشبة
16-10-2006, 10:23 PM
( 61 )

قلت الفرج جه خلاص
وانحلت الأزمة وجه الخلاص
انقتل أخويا كفايه خلاص
قالوا لى لسه معانا رصاص
*****
سامح عبد البديع الشبة
16-10-2006, 11:30 PM
( 62 )

خمسين طعنة شقت القلب وشرحته تشريح
واندفن جواه الحزن من غير إذن ولا تصريح
وانكفت دمعة م النِن نشفت دم الحلم الدبيح
وانفرط م الحلق كلامه لا همس ولا تلميح
*****
سامح عبد البديع الشبة
16-10-2006, 11:31 PM
( 63 )

مابقتش أصدق حد
لا بهزار ولا بجد
دا كل يوم على ضهرى
مليون جبل بيتهد
*****
سامح عبد البديع الشبة
16-10-2006, 11:32 PM
( 64 )

فراق ووصال ... خصام وصلح
جنة ونار ... سكر وملح
وأنا وحبيبتى فى الدنيا عايشين
بنفس واصل ما بين سهم ورمح
*****
سامح عبد البديع الشبة
16-10-2006, 11:34 PM
( 65 )

كل دى أحلام
أحلى م الأحلام
سهلة جداً تحقيقها
بس لما أنام
*****