|
( 31 )
خيرونى ما بين الألوان فاخترت أنا الأسود قالوا لى ما له الأبيض قولتلهم بكره يتقبل اسود قالوا لى طب والعسل قولتلهم أحلى مافيه الأسود قالوا لى اتفاءل بالنهار اللى جاى قولتلهم يا خوفى يتقلب اسود ***** |
( 32 )
كتير سألونى عنى وعنها قلتلهم هاشيل همى وهمها جيت أدور على همى صعب عليه همها ***** |
( 33 )
يا لى الكورة دايماً فى ملعبك وعمرها ما طلعت بره آوت سنتر وباصى وشوت إيه يمنعك دا عمرك ما جالك أبداً آوت فن الكلام المزوق دا لعبتك واحنا اللى دايماً فى الآوت ***** |
( 34 )
ملكت فى ساعة واحدة العالم فى إيديه لاقيته حته واحدة من طينه وشوية ميه وصبح فى ساعة تانية مش ف إيديه حبة تراب رماهم الهوا ف عنيه ***** |
( 35 )
حط على شباك بيتنا حمام جم مكسور الجناح وبينزف دم سال ع الحيطان وصبحنا ف هم وجه علينا الليل بجرح ما يتلم ***** |
( 36 )
عديت على بحر الهوا وفردت أنا دراعى شدنى بحر الهوا قلت يا دراعى سألت عن جنيته فردت مافيش داعى وابعد عن سكته دا الغدر فيه راعى ***** |
( 37 )
قلبى قايد فيه النار للى بيحصل ف الدار قالوا نبنى أقوى جدار صرخت لأهـ .. هاضرب بالنار ***** |
( 38 )
شفت ألوان كتير متلونة ع الخدود الأبيض لون الفل والأحمر لون الورود بس عمرى ما شفت ألوان كتيرة قوى إلا على جناحين الحمام وع الحدود ***** |
( 39 )
الأستاذ الكبير قاعد على مكتب جاله الفراش ومعاه واحد سحلب مرة يشطب والتانية يشرب قال إيه الأستاذ بيكتب ***** |
( 40 )
حاجة واضحة وزى الشمس مش محتاجة نظر ولا همس موافق ... مش موافق الحرية دى كانت بالأمس ***** |
( 41 )
حبيتك يا حبيبتى ومش هاقدر أقولك عشان انتى من سنى وأنا من سِنك وبكره يجى اللى يشترى ويقدر ويخطفك من كفى ويبعدنى عنك ***** |
( 42 )
يامه تعالى شوفى حالى وتعالى شوفى اللى جرالى دا كل واحد من إخوانى رافع عَلمه وبيقول وأنا مالى ***** |
( 43 )
عشموها كتير بالحلق وذاع النبأ ع الملأ لا هِى فِرحة بودَنها ولا هى دِخلت السبق ***** |
( 44 )
سألتك بتحب .. ما جوبتنيش طب رد .. أيوه .. مافيش رسينى .. اسكت وأحب وأعيش ولا أصد .. وابعد عنك .. ولا جيش ***** |
( 45 )
شبابيك بيتنــا القديم كلها قديمة ما بين الخرسانة والطوب ما هى سليمة فكرت أشيلها بالشاكوش من مطرحها جات ريح من الشمال بنسمة عليلة ***** |
( 46 )
تصور إن الحامل والمحمول بقوا واحد وإن العيل والراجل كمان صبحم واحد لما يشيل الحامل المحمول بسهولة ويأمره الراجل بضرب العيل المارد ***** |
( 47 )
ما بين أربع حيطان بحيا وأموت كذا مرة أنام مرة وأموت مرة وأعيش مرة ومرة ولا عمرى فكرت فى بكره ولا اللى جاى ولا كانت حياتى فى يوم أبداً مره ***** |
( 48 )
تيجى نبتدى صفحة جديدة ما احنا حياتنا يا حياتى كلها صفحات تيجى ننهى صفحة قديمة ما احنا كتابنا يا حياتى فيه غلطات تيجى تهتدى وتكونى شريكة دا احنا حياتنا يا حياتى كلها درجات ***** |
( 49 )
من زمان وأنا لسه بحلم يجى بكره بألف عيد يزرع جوانا ألف بذرة تبدر سنابل ف كل إيد نفرح ببكره وبعده اللى مستنى لسه وليد ***** |
( 50 )
مش من حقى ولا من حقك افتح بقى ولا تفتح بقك امشى براحة وجنب الحيط وبص ف صورتك وصورة جدك ***** |
( 51 )
عشت قصة حب وكتبت قصايد فيها المتهنى والشقى والفريسة والصايد فيها الشهيد والجبان والضعيف والمارد الكل فى عذاب والكل جحود كايد ***** |
.
. إستمر ياسامح فنحن نتابعك |
( 52 )
ما بين نفس ونفس آدينى عايش وبتنفس وما بين سلوك عريانة خايف لتتلمس بمشى وأنا ف سكتى شايف وبخَمِس ***** |
( 53 )
كل البيبان المفتوحة اتقفلت حتى الشبابيك المواربة اتحشمت واتحجبت واتستت واتهننت وف أوضه ضلمه اتربطت واتكممت ***** |
( 54 )
ريان يا عرب ريان طلقه من ده أو ده سيان مادام بيصيب الهدف بنجاح يبقى يستحق أعلى وسام ونيشان ***** |
( 55 )
ضاعت منى خطوط الطول والعرض واختفت ملامحى وأنا ع الأرض وانعكست المراية واتبدلت الأرض وصبحت واحد تانى بطول عرض ***** |
( 56 )
حرمونى أنطق رقم ستة بالإنجليزى أو أبص على أى ست يا عزيزى لأن كدا عيب وغلط ومايصحش تقف جانبى ف الطابور الحاجة زيزى ***** |
( 57 )
دستور يا سيادنا دستور قررت ألبس كستور قبل ما يجى علينا الدور وتدور بينا الساقية بأى تور ***** |
( 58 )
البنت دى أحلى بنت أنا شفتها فى رسمها ووصفها واسمها البنت دى مش أى بنت عرفتها البنت دى جوه القلب نبضها ***** |
( 59 )
مين اللى دبح الديك وكال الفرخة مين اللى دمع عنينا وموت الفرحة مين اللى دبح ف القلوب وخِتم بالقرحة مين اللى دمع عنيه مليانة بالفرحة ***** |
( 60 )
مليت فرجة على بعضنا البعض وزهقت من قاعدتنا جنب بعض لازقين لزقة ماشفتهاش على حد كأننا هانموت وبنموت لو سبنا بعض ***** |
( 61 )
قلت الفرج جه خلاص وانحلت الأزمة وجه الخلاص انقتل أخويا كفايه خلاص قالوا لى لسه معانا رصاص ***** |
( 62 )
خمسين طعنة شقت القلب وشرحته تشريح واندفن جواه الحزن من غير إذن ولا تصريح وانكفت دمعة م النِن نشفت دم الحلم الدبيح وانفرط م الحلق كلامه لا همس ولا تلميح ***** |
( 63 )
مابقتش أصدق حد لا بهزار ولا بجد دا كل يوم على ضهرى مليون جبل بيتهد ***** |
( 64 ) فراق ووصال ... خصام وصلح جنة ونار ... سكر وملح وأنا وحبيبتى فى الدنيا عايشين بنفس واصل ما بين سهم ورمح ***** |
( 65 ) كل دى أحلام أحلى م الأحلام سهلة جداً تحقيقها بس لما أنام ***** |
| الساعة الآن 05:58 PM |
Powered by vBulletin® Copyright ©2000 - 2026
