قالها شامخ على الله ..ياعنيدات الليال = ماحوى مقبل سنيني ..يجبر الجرح الدفين
لا تلاشت لي مصيبة .. حملها هد الجبال = تبتدي ثاني مصيبة .. قو الأولى مرتين
العمر رحلة تجارب .. والوفاء كله خيال = والزمن لو طال فيني ..مابقى شيء ٍ ثمين
المساء هذا كئيب .. وذكرياتي به طوال = والثواني ..والدقايق ..بالـخطى متثاقلين
والسماء ضمت قمرها .. مع بزوغ اول هلال = ((شهر خمسه)) والدموع الغالية فوق الجبين
الفتاة اللي سكنها العين ..واجفوني ظلال = اعزفوا ليلة كفنها .. نغمة الصوت الشجين
والله انه ما نفعها ..لو تصل حد الهبال = والله انه ما منعنى ..غير رب العالمين
قدر الله ..وانكتب عنوان هذا الحب زال = والقدر لا حل حكمه ..كلنا له مذعنين
كنت شاري حبها ..فيه الدلع ..فيه الدلال = لكن انه ينتهي حب انعمر طول السنين..!؟
هذا والله .. هو سبب خوفي .. وجرحي .. والهوال = هذا والله .. هو سبب دمعي..وحزني والونين
هذا والله .. هو سبب ما حدني فوق احتمال = يوم شفت الموت .. وانتي يا حياتي ترحلين ..!
ان رحلتي .. ليش بأبقى ..والقمر شوفه محال..!؟ = وان بقيتي.. ليش بأرحل .. والقمر توه مبين؟؟
وان سألتي ليش بأرحل ؟؟ قلت لك هذا المقال = ((الرحيل اسهل طريق ٍ ..لأجل ماتبقى سجين ))
وأن سألتي ليش تتركني بساحات القتال = قلت لك ما تـّـل قلبي ..غير ناس ٍ خاينين

الخطا غامض .. ولكن .. تسمحي لي بالسؤال = هل رضيتي يوم قالوا .. ( هل بغيري تقبلين)؟؟

كانك انتي راضيه .. ما عاد باقي لي نضال = لأرتحل عبر الصحاري ..وانتهي وابقى حزين
لأرتحل عن دار حايل .. واهجر ادروب الشمال =لو بها ناس ٍ عزيزة ..في غلاهم واصلين
لأرتحل فوق الخيال ..ولأندثر تحت الرمال = ولأنتهي عن كل سكة ..في دروب العاشقين
وكانك انتي رافضتهم .. واجبروك ِ بالحلال = واصدروا عقد النكاح .. ولا سألو _ هل ترفضين )؟
الله اللي راد يا عيوني ..ولا فيها جدال = واسحبي ذيل الهزيمة .. وافعلي ما تؤمرين

مادريت الا كروت افراح ..تدعوني تعال = حفلها ليل الثلاثاء ..والخبر صبح الثنين

ولايمدي ..ولايمكن.. لتحقيق الفصال = دام باقي ليل واحد ..يا عيوني وش تبين .؟؟؟
أومريني عبد طايع ..قيده وقته غلال = واقتليني وسط دارك ..واشربي دمي اللـ؟ـين
دامني عن ديرتي يا بنت قطـّـعت الحبال = كيف ابدري للفرح يا بنت وانتي تعرفين ؟؟
اعذريني ..مادريت الا بكسوفك والزوال = اعذريني ..ماجداي الا صدى صوت الأنين
اعذريني .. لو رحلت وغادرت سفن الوصال = اعذريني .. لو قطعت الوصل بالناس اجمعين
اعذريني لو نسيت ..وقلت لك هذا محال = اعذريني كانك انتي يا حياتي تعذرين
اعذريني يا حياتي ..كا ماجالك مجال = اعذريني يا حياتي قد ما انتي تقدرين ...!؟
والا انا يا عزتي لي ..حالتي ماهي بحال = زين اكمل بعد ليلي يا حياتي ليلتين
كيف اصدق ما حصل لي .. والله انه كالخيال = كيف اكذب والنواظر ..والجوراح ..شاهدين
اكتفيت ارجوك يا سـْنيني .. عذابي لايزال = يا عذابي .. وش بقى بي يا سنيني تجرحين
من شبابي والحزن .. في خوته خوة رجال = مايفارقني .. ودايم عن يسار وعن يمين
لاغفيت اشوفها بالعين .. تبكي للطلال = ولا صحيت .. اشوفها قدام وجهي باليدين
انتبهت لدنيني .. والحزن مدري ليش طال؟ = واعتزيت .. وقلت يا الله عن كلام العاذلين
لو خذلني في تعاملهم .. رديين الرجال = و الله اني ما اتهاون .. عن علوم الطيبين