لبيـه ((يانـوره)) ولبيـه مليـون=لبيـه ياصـوت الفـرح وانتعاشـه
صوتش يزيل الهم لو كنت مغبـون=وصوتش يصحي ميتٍ في فراشـه
يادمعة الشاعـر وياشـوف لعيـون=وياطب قلبي لو غدا بـه هشاشـه
عروق قلبي من فراقش بها طعـون=ودموع عيني فوق خـدي رشاشـه
انتي النفس والنبض والعين والنون=وانتي دفاء جسـمٍ غدابـه رعاشـه
ياغلى حبيبت قلب شاعر به جنـون=لما سمعت الصوت جاني شواشـه
لما ذكرت امي غدى الراس مسكون=جـنٍ براسـي يلعبـون الخشاشـه
اسري لها بالليـل مانـي بممنـون=واسري وخلي كل ((منفذ)) اطشاشه
امشي على الموتر وانا اعد مليون=اسابق الطيار واحـرق اقشاشـه
كل العساكر لو غدو صف مضمون=اهاجـم الريـس ورافـض نقاشـه
مجنون في مجنون مجنون مجنـون=مجنون لمي بـس ماهـي طياشـه
قلبي من فراقش تزايد بـه شجـون=وصدري تزايد به همـوم وطفاشـه
ياوجد حالي وجد من كان مسجـون=ولا كسير السـاق والمـوت ناشـه
لا تسألين الحال وشلـون وشلـون=الوقـت يلعـبـي وزاد ابتـلاشـه
الدمع والعبرات والصدر مشحـون=واعضاء جسمي كنها فـي هواشـه
ادري بأن قلبش يردد متـى يجـون=وادري بانـش تحتريـن الحشاشـه
مشتاق لش يمـه ومشـاق بالعـون=كثر اشياقي لش غدى بي خراشـه
والله ورب البيت دمعي غدى مزون=وانا اكتب الأبيات جاشـه بجااشـه
لبيه يلـي اسمهـا اولـه ((نـون))=نور الحيـاه وبهجتـي والبشااشـه