ياليل وش عذر السعي لإجتهـادي=والوقت صادق في مواعيد كـذاب
أسري بعذري والضياع إمتـدادي=ويشيلني مخلب زماني على نـاب
ياليل كـم دوّرت غايـة مـرادي=وأنته يطل بصفحتك نجم وشهـاب
ياليل أنا فارس طرحنـي جـوادي=كبوة جواد وشارب الحب ماتـاب
أسوق للحلـم البعيـد إعتقـادي=ويعود به من قاسي الوقت نهّـاب
ياسيّدي غرد على الغصن شـادي=وذكّرني اللي ماتناستـه الأسبـاب
مابين غيمٍ يغِـرِق رضـاه وادي=وبرقٍ فتح له في عيون الرجا باب
آمال وأحـلام وغـرام ومبـادي=مرسولها ياطيـر ودى ولا جـاب
ناديت واسأل عن صدى من ينادي=ويرجع صداه بوحشة جبال وشعاب
مرّت سنين وصادق الحلم غـادي=وأنا على رجواي خايف ومرتـاب
الهـم شربـي والتباريـح زادي=والحظ يرمي له زمانين ماصـاب
من يومهاعايش بسجن إنفـرادي=أجمع شتاتي وأنثر أبياتي أحبـاب
وآخذ وألوّن من بياضي سـوادي=والليل زيّن صفحته نجم وشهـاب