|
ثلاثيات ورباعيات سامح الشبة
( 1 )
خليك ع الأرض ماشى وأوعى تطلع فوق ازعق وقول ماشى واتكلم برضه بذوق دا أنت ع الأرض ماشى وبكره تطلع فوق ****** |
( 2 ) سافرت مع موجة زرقة فى حضن البحر حدفتنى فى موجة تانية مالهاش بر لاقيت نفسى فى دوامة بتجر لا أنا فيها حزين ولا بتسر ***** |
( 3 )
حبست نفسى فى زنزانة ملهاش آخر لافيها حد بيتكلم ولا حد بيقول اتاخر وأدى دنيتى أنا وحدى أنا المسحور فيها وأنا الساحر دنيا صغيرة على قدى بعيدة عن العالم الساخر ***** |
( 4 )
قلت أعمل حساب للزمن وأوفر وأحط القرش ع القرش يكتر يمكن بنت الحلال تقدر تصبر لما البيت الصغير يكبر ***** |
( 5 )
علمونا إزاى نكتب الحروف وإزاى نواجه كل خوف ولما جات فرصة المواجهة تعالى معانا اتفرج وشوف ***** |
( 6 )
يا عينى ع الولد اللى صوته اتنبح وراح فيها لمـا شـاف الشــبح بيقرب منه ويقطع كل الصحـف ويوشوش ف ودنه كان غيرك فلح ***** |
( 7 )
زمان هتفنا بأعلى صوت يا إما النصر .. يا إما الموت ومرت أيام .. وجات أيام والخوف جوانا ما له صوت ***** |
( 8 )
قلت أعمل لنفسى تابوت قبل ما تمر الأيام وتفوت ما احنا فى زمن يا بنى ما تعرف له حياة من موت ***** |
( 9 )
قيس وليلى اتولدوا من جديد واختلت الحكاية وخلفوا سعيد تعالى واسمع من عمك قيس إيه اللى جراله وإزاى بقى شريد ***** |
( 10 )
سلمت ف مرة على حوت ماشى ع الأرض معاه " ريموت " شتمته وضربته فى خيالى وورايا ساكن جسدى فى تابوت ***** |
( 11 )
قول للحمار يا حمار شى هايمشى وقول يا بنى آدم إمشى ما يمشى مهما ضربته بالعصا والسوط اللى ف دماغه ف دماغه هايمشى ***** |
سامح
رباعيات جميلة فكرتنى بصلاح جاهين وانا كتبت حاجة صغيرة بعد التمام ابتسم بعد الظلام فقنا شفت جمال طلعته من همنا فقنا بيطل فوق أرضنا ساخر ومتبسم دنيا بتلعب بينا شغلانة فى سوقنا رائع يا سامح دمت بكل ود نغم |
اقتباس:
رائعة أنتِ فى كل نوع أدبى ، وسررت جداً حينما طالعتنى برباعية جميلة ورقيقة . تقبلى تحياتى وتقديرى |
( 12 )
الدنيا سجن كبير وعجيب فيه الحبيب فى ضل حبيب لو غابت فيه يوم الشمس ما تعرف قريب من غريب ***** |
( 13 )
قمت أصلى الفجر لله وأدعى ع اللى ربنا نساه يارب خد بإيد الظالم وعلى جهنم .. ما تسمع نداه ***** |
( 14 )
الدنيا بنت حلوة مؤدبة لابسة طرحة بيضة منقطة ماسكة بإيديها نار مولعة للى يقرب منها تولعه ***** |
( 15 )
ع الفول صحينا وافطرنا واتغدينا واتعشينا ونمنا ورجعنا صحينا وقومنا لقينا طبق الفول مِلازمنا ***** |
( 16 )
ألمح فى عيون الناس كلام يجيبوا فى سيرتى كتير ما نام أفكر ودقق فى كل نظرة أقول دا علام مش كلام ***** |
( 17 )
غنيت للناس أغانى ومواويل ورقص الشجر ومال النخيل وفرح النهار وسهر الليل ونسينا زمنا وارتضينا بالبديل ***** |
( 18 )
قلت الوطن بيتباع يا رجالة ومافيش حاجة أغلى م الكرامة قالوا لنا الحكاية بسيطة خالص حبة جاز على بنزين وولاعة ***** |
( 19 )
نقطة ورا نقطة ورا نقطة لابد فى الآخر هاتجيلك نقطة من نقطة عيش وملح وهدمه لنقطة كلمة توصلك للنقطة ***** |
متابعٌ لـ هذا الطرح اللافت تحياتي لك يا سامح |
اقتباس:
شكراً على مرورك الكريم ومتابعتك الجميلة . تقبل تحياتى وتقديرى |
( 20 )
قلنا عروبة وقومية راحت دى .. جات ديه وبقلنا على الحال دا كده قول ألف سنه وشويه ***** |
بدق دقة وراها دقة
بكل خفة وكل رقة إصحى يانايم قوم يا أبن مصر الصبح فاتك والضهر فاتك فكرت مرة تصحى مصر أهـ يامصر كرباج بيلهب ضهور نيام من غير كلام من غير سلام |
( 21 )
سجنو الكلمة فى لسانى قلت ومالو ما أنا المسجون سلبو العقل من راسى قلت ومالو ما أنا المجنون سحبو البذرة من فاسى قلت ومالو ما أنا المديون حبيت اتكلم واعقلها واتوكل مالقيت نفسى إلا وأنا مدفون ***** |
( 22 )
كويس .. كويس .. كويس .. كويس كله هنا.. كويس .. كويس وكمان هناك .. كويس .. كويس وفى كل حته .. كويس .. كويس ***** |
( 23 )
مال عليه صاحبى وقالى يا خايب ماله حبل الوصال عندك كدا دايب رديت عليه بعكازى وبشعرى الشايب الولد مهما كبر عمره ما هيبقى شايب ***** |
اقتباس:
آهـ يا / نغم ... آهـ مليون أهـ طالعه من قلبى وأنا قلبى ما يستحملش لهفة فى وصال وحرقة فى بعاد أهـ يا قلبى يا صاحى ومابتحلمش |
( 24 )
أيوه علمتنا الدولة ومابننكرش وخادت بروزم الروزم وماخلتش وزرعت فى عقولنـــا مبدأ اللى معاه قرش يساوى قرش ***** |
( 25 )
الجهات الأصلية فى بيتنا مخرفة فى الجنوب صورة لبنت مِدمعة وفى الشرق عجوز بهدوم مِرقعة وفى الشمال لولد فيه النار مولعة ***** |
( 26 )
اكتب يا أديبنا اكتب واكتب مهما كانت تحتك الأرض بتتشق .. اكتب واكتب ولا كانت فوق رقبتك سكينة بتدق .. اكتب واكتب ليوم يغيب فيه القمر وينشق .. اكتب واكتب ***** |
( 27 )
صنعت فى يوم عربية لعبة بأربع عجلات وموتور شِحته مشت العربية ببطء وبسرعة وكان اللى سايقها الواد سِعده ***** |
( 28 )
كنا زمان أطفال شاطرين فى الجد واللعب والحب ولما كبرنا صبحنا خايبين فى الحب والصدق مش نافعين ***** |
( 29 )
طقت فى دماغى فكرة وراح أعملها أجمع أعلام بلادى واظهر معالمها وألغى كل الحدود ويبان أصل معدنها قبل قرارات الكراسى وكدب عاملها ***** |
سامح
دوما متابعة لك انا ويسعدنى تلك المتابعة بكل حروفك الرائعة نغم |
فلأحجز هنا كرسياً !! جميل أنت سامح ..حين تبوح بشكل يختلف :) صافي مودتي .. و أنتظر ! |
اقتباس:
يسعدنى متابعتك لأعمالى القصصية ورباعياتى . تقبلى تحياتى وتقديرى |
اقتباس:
أ/ جليلة ماجد سعيد جداً بوجودك ، وجميل حضورك بين نصى القصصى وبين رباعياتى . وفى انتظارك دائماً تقبلى تحياتى وتقديرى |
( 30 )
كلمة الآهـ فى لسانى بتقول آهـ وآهـ لما تيجى تقول الآهـ آهـ وهى آهـ ولما تيجى تقول الآهـ وهى مش آهـ فيحسدوك على حالك ومن قولة آهـ ***** |
| الساعة الآن 02:48 AM |
Powered by vBulletin® Copyright ©2000 - 2026
