الليالي توْدِع العاقل هبيل = والامور اليوم سلّم ياسلام
راح جيل ومقبلٍ ياخوك جيل = يالله اني طالبك حسن الختام
العزيز يذل ويعز الذليل = والسباع تباع في سوق النعام
ودفتر الشيكات في مخبا البخيل = ماظهر في حرب والا في سلام
واللبن والزبد في بطن الصميل = ما اطعم الجايع ولا فطر صيام
وش يجيب (الدوم) لغروس النخيل = فرقهن فرق الكرام من اللئام
ومن جلب لاهل الحسا تمرٍ حويل = علموه ان الهزيله ماتسام
حسبنا المولى وهو نعم الوكيل = عالم النيات خلاق الأنام
مانبي منهم كثير ولا قليل =ولا لنا مقصد ولا غاية مرام
والحظيظ اللي يحسّب للرحيل = باكر ليا لف في مترين خام
مايفيده لا خوي ولا زميل = ولايفيده لاخوال ولاعمام
فانيه والادمي عابر سبيل = اترك اللي فات وانظر للأمام
والمهايط والحكي ماله ذبيل = مارفع طامن ولاطمن سنام
والشعير يكال بشوال و زبيل = والذهب محسوب بالملي جرام
والكلام احيان احد من الصقيل = يتلف الارواح ويقص العظام
والصبر طيب لو انه حنظليل = والعفو والصفح من طبع الكرام
استغلوا فرصة الشهر الفضيل = افتحوا صفحة محبه وانسجام

أخي الفاضل
علي الحسني
كم شرفني مرورك
وسرني حضورك
كل الشكر يالغالي
ومعذرة على التأخر !!!