خط النهايه وحدتي فيها نهايه مابديت =ضاق الوجود بكسـرتي حزنه على حالي كبير
شفت الهزيمه مقبله يمي واناماقد سعيت =الا على عهدٍ مضى حسبت ان لي فيه خير
عطيت وصلي في غلا ولقيت وصلك لاقسيت =يموت احساسي ماترد حق المعنّا والكسير
يامقفيٍ عني تصد سرى بك الليل وسريت =في ليلةٍ تسري ثقل ومن عادة الليل المسير
ماتنشد حالك في زعل والا برضاك ولاخليت =ليه المصايب ماتجي الا على راس الفقير
وانا فقير وعزتي تاجٍ على راسي اغتنيت =وانت مصابي والالم والله على السلوى قدير
وماشفت في نومك حلم صورة حياتك لاصحيت=والا معاني في لغز تسوق حلٍ مايصير
او كلمةٍ في خاطرك او لحظةٍ فيها اشتهيت =يعم صدقك والعدل او تسمع لصوت الضمير
مجرى حياتك في يدي وانا حلمٍ فيك وخفيت =وانا مداها في لغز غموضه المعنى عسير
وانا العدل في خاطرك وانا وفاك ولو جفيت =وانا ضميرك لاصحا وانا مماته لو يجير
جيتك ياظامي من وله خذته حناني وارتويت=وخليت جدبك في فضا ريضانها سيل وغدير
جيتك ياساكن في عما نورك ماشفت ولارايت =معطيك من نوري لجل ظلمة غرامك تستنير
غفلت وماادري قاصدٍ والا سفيهٍ مادريت =جحدتني كل العطا كن العطا مني صغير
ياويل حالي ياقضا تعبت هالحال اكتفيت =ودي الاقي لو سبب يدمح بي الحظ المرير
عجبت لامرك يابنت تجاهر بذنبك عصيت=وتكابر بظلمك جهل وعارف ان ذنبك خطير
تحسب انك من ذهب والا على الشمس استويت =وان الكواكب لعبتك والكون لجلك يستدير
مخافة الله ماعرفت ولاحشمت ولااستحيت =وتذكر الله لاابتلاك وتطلب المولى البصير
يفرّج عنك مبتلاك وانك تتوب اللي خطيت =وتعوّد ذنوبك مثل بعد الفرج وقتٍ قصير
عجبت لامرك ياغـلا سقمت حالي ماشفيت =جزمت الفرقا والهوى مايقبل براي الشوير
لحظه حبيبي مابعد علمتني كيف انتهيت =كتبتني قصة ولا خليت لحدودي اخير