الله على مالٍ مثل مال قارون=فضلٍ من الله مالاحد فيه منه
في قدرته من كون الخلق والكون=اللي جعل للخلق نارِ وجنه
ماقلتها في المال مغرم ومفتون=لو إن حب الماال في الناس سنه
لي غاية ولله ماكان ويكون=علاّم ماتخفي الصدور ونكنه
ابغا اكرم اللي حالهم دون في دون=وأغيث مضهودٍ ظروفه حدنه
واطلق حجاج اللي من البعد ينصون=ماللعذر فيهم طريقٍ يسنه
وافك قيد اللي ورى الحبس مسجون=ديانته مابيتوا له محنّه
عليه دين وعالج الدين بديون=قصده يجمعهن..وهن فرقنه
حسابهن لاعدهن حول مليون=ماكان في يوم يحسب ياصلنه
طاوع ظروف الوقت بالهون بالهون=يبغا يحقق غايته وادركنه
عزيز نفس ولايبي يلحقه هون=لكن تصاريف الزمان أخذلنه
أصحابه اللي كان لا قبل يهلون=ماحدٍ فزع منهم ولاسال عنّه
أبغا أدفع لديانته لين يرضون=ماابغا الشكر منهم ولاابغاه منّه
أرجيه من ربٍ له الخلق يرجون=في يوم به للناس نارٍ وجنّه
لافيه لاداين ولافيه مديون=كلٍ حقوقه وافيات أوصلنّه
يالله يامنجي من الحوت ذا النون=المؤمن اللي فيك ماخاب ظنّه
يامعطي الدنيا لأشباه قارون=عجل اخطاي لكل فرضٍ وسنّه
المال يفنى والمخاليق يفنون=والرابح اللي لك دروبه هدنّه