الوصل عيدك يالقلوب المواليف=والهجر والفرقى عدوّين الاحباب

ياويش عذر اللي له ايام ماشيف=اقفى ولا ادري ويش عذره والاسباب

غروٍ جماله فاق كل التواصيف=عليه نظرات المخاليق تنساب

كنّه لحاله فوق روس المشاريف=والبيض من دونه مجاريح واغراب

يزهى المدينه وان وطت رجله الرّيف=تزهر بساتينه نواوير واعشاب

واليا حكى كنّه يزيد السّواليف=ذوق وعذوبه وابتسامات واعجاب

له نظرةٍ لا سلّها وقعها سيف=القلب منها يشتكي مابعد طاب

ربيع لا جارت لظى الشمس بالصيف=ومدهال لا شحّت سما كل الاصحاب

شوفه يريح من العنى والتّكاليف=وضحكة حجاجه تبري جروح منصاب

ان غاب عني سامرت عيني الطّيف=ارجي وصاله والامل فيه ماخاب

كنه معزّب والا انا عنده الضّيف=العين بيته والهدب حوله حجاب

احب لاجله واكره احيان وآعيف=واقدّره واحسب لشرهاته حساب

هذاك احبه دون لادري ولا كيف=وتوّي عرفت ان الهوى حيل غلّاب

الشِعَرْ / حسِينْ النَجْرَآنِيْ ..
صَح آلسَآنِكْ وآعتَلىَـآ شَآنِكْ .. نًصْ مُغَلفْ بـ آلجَمآلْ والعُذُبَهْ ..
تَقدِيريْ لكْ ..!!