منتديات منابع الأدبية - انا البارح حريبن للرقادي

انا البارح حريبن للرقادي
جفاني النوم عن جفنيّ غادي
طرالي هاجسن واشغل خيالي
وقام الجاش يقدح كالزنادي
يذكرني قديمن قد تعفى
لكن القلب في ذكراه عادِ
بعدما جملة الحيين ناموا
اشد القاف وابنيله عمادي
بيوتن قاعها جوف الضماير
ومسكنها تجاويف الفؤادي
اضمنها جديدات المعاني
بنات الفكر من صلب اعتقادي
وبسم الله ابدا واتوكل
على الله كافلي رب العبادي
عسى ما اقول ما القاه ضدي
بيوم الفصل والميزان بادي
اسج الرجل في دنيا عريضة
فساح ٍ ما تحدد با متدادي
ومنها ما نفعني جبت صوبي
سواه اترّكه هو شرّ زادي
اشوف ان المصايب لو تتالى
عبر يا سعد من منها استفادي
واشوف الصبر وان طال وتعدى
طبيب للبلايا ذا وكادي
من اول يا عرب تشرى النصايح
لكن اليوم ضاربها الكسادي
تسمّع يا فهيمٍ ما اقوله
نصيحة للحواضر والبوادي
حلال الرزق وان شابه حرامٍ
كبستانٍ تغشاه الجرادي
وترى المعروف ان ما صار باهله
يعود نقمةٍ ما به مفادي
مثل من يزرع صباخٍ بحنطة
يطول الدهر ماعين حصادي
بصدري هم اعياني احتماله
قضى صبري ولا عندي مدادي
عن الاوطان في غربة طويلة
عليه طال بيني وابتعادي
غريب الدار ما يهنى بعيشة
كمسجونٍ حبس حبس انفرادي
تكمل ما نظمته من ضميري
بقيفانٍ تعبر عن مرادي

عبدالله المهنا النعيمي