جرمتني بالظنون وعـــلقــت لي مــشـنقتها=واذبحت عذري قبل ما ينولد داخل لساني
وأعلنت هجري وانا المظلوم داخل محكمتها=وأهدمت داخل مرابيع الغلا قصور ومباني
وأكسرت كاس المشاعر والبيوت اللي روتها= و أرتوت كاس الفراق اللي كسرته في زماني
وارحلت والخطوه اللي تمحي العاشق مشتها= والسنين اللي تنسيها في عيني كالثواني
غــيبتها سنينها عــني وصفحتهاا طــوتها= ولا بقى غيري معي في رحلة كتاب المعاني
لين في صدفه عيوني بعد فرقاها صدفتها= و أرتوى قلب(ن) تحرّى شوفها حلم وعياني
أوجست روحي وأنا كلي وله لمعانقتها= لا تروح وجرحنا ينبش ونجرح جرح ثاني
قلت يا روحي بلا وإن كان ما جروحي برتها= ما يــداويها الزمــان اللي بلياها كــواني
جيت هاقيها وخابر طيبها ومسامحتها= جيتها بالصورهـ اللي حببتها في كياني
علها لا شافت الصوره تصحصح ذاكرتها= وتفتكر ذيك الحلوم اللي حلمنا والأماني
قالت ارحل واليمين اللي رحلت لمصافحتها= عودت والشوق جثمان(ن) تشيله بالهواني
قلت وعيوني تصب الما على جمرهـ لظتها= كيف يصير المجني المظلوم في ناظرك جاني
كيف قدرت عينك الفرقى وبالشبهه عمتها= عن خليل(ن) ما نسى هجرك ولو طال الزماني
كيف أنا.. وإن قلت انا تعرف وصايفها وسمتها= كــلمة(ن) فــي قــلبها تـعني المحبه والتــفــاني
كيف أخون اللي عروقي من غلاها استشربتها =و أرتوي منها ورق غصن الهواجس في لساني
وفي خضم الذكريات اللي في ماضينا انكرتها =أنتفض حب أسرهـ الظن في جوف المحاني
قالت اسكت.. والدموع اللي تروضها عصتها= يا حبيبي لا تزيد النــار في جوفي كفاني
تعال..وأبواب الهوى في حضنها لي شرعتها=وأرتحل قلبي من الرمضا لمرباع الجناني
وخابت ظنون بغت ذبحي ورجعتنا ذبحتها= و أنتصر مظلوم في سجن الهوى واليوم هاني