يفز قلبـي لا سمعتـه يصـوّت=لاوحيت صوته قلـت لبيه..لبيـه
هذاك من حبه عروقـي تـروّت=ممزوج وسط الدم يجري مجاريه
حبه على حب الخلايـق تفـوّت=في ذمتي حتى على الروح مغليه
صفحة غلاه بضامري ماتطـوّت=حاظره في قلبي كما كان ماضيه
ابي وأحبه ليـن حتـى أنمـوّت=أحب من حبه واعـادي معاديـه
ارضاه عندي فرصـةٍ ماتفـوّت=أبيع مايزعله ورضـاه بشريـه
قلبي وروحي له قسـم ماتغـوّت=روحي وقلبي كلها ملك في ايديه
عسى المنيـه لاتدنـت ونـوّت=تصيب غيره لانوت به وتخطيـه
تاخذ بخيلٍ من ضيوفـه يلـوّت=وتخلي اللي غالي المال يصخيـه
ياالله يا اللي من عطاك انتقـوّت=أحفظ ابي ياخالقه واحتفظ فيـه
وأمٍ عظامي مـن لبنهـا تقـوّت=جسمي بصغري من لبنها تغذيـه
تلطف وتستلطـف ولايـوم روّت=ماهي تروي الناس لطفٍ تسويـه
من لطفها ماحدٍ درى ويش سوّت=لاسوت المعروف مأحد درى فيه
تعطي ولو تعطي كثيرٍ(ن) تشوّت=ماهي تكاثـر ماتمـده وتعطيـه
وان جيت من غربه بجسمي تلوّت=بجسمي تلوى مثل غالٍ وغاليـه
والله لو روحـي تلاشـت وذوّت=أني لهـا فيمـا تريـده وتبغيـه
ولبيه لمي كل ماامـي أاتصـوّت=لبيـه اكررهـا بمليـون لبيـه