ياصاحبي لوّ اكبر همومي فراقٍ مُحْتَمل = عن عيطموس ٍ يَسْلِب عقول البشر سلهامها
ماشفتني قدّام عينك واقفٍ مثل الجمل = ماضرّني شيل الحمول الكايده وِجْسامها
أتعب على كسب المراجل والعريب ليا صمل = ساق الخيول المسرجات ونظرته قدامها
والا الهَمل مهما تسوّي فالزمن تبقى همَل = تَحْلَم ولاقد حققت سود الليال احلامها
وياعنك واللي يسمع بليل الظُّلَم دَبْيَ النّمل = ماحدّرَ الدّمعه بعيني غير شيٍّ ضامها
فيّه ألم طاغي وانا عندي بصيص من الأمل = يِنْسيني جروح الليال الموجعه والامها
إِبْه اكتب حروف القصيد اللي ليا منّْ اكتمل = رزّت لي الفرحه على روس الطوال اعلامها
شعري رساله هادفه ماهو بتركيبة جمل = ولاهو بسلعه في يد البيّاع كلٍّ سامها
لاوالله الاّ واقعٍ يَحْكي وجرحه مااندمل = يَحْمِل هموم الأمّه اللي عزّها باسلامها
من يوم ماصارت تقول وقولٍ بليا عمل = يغري بها اللي طامعِ بْها من ألدّ اخصامها
هذا هو الهم الكبير اللي كِسر ظهر الجمل = والاّ دموعي ماتسيل الا لشيٍّ ضامها