شكرا على كل الكلام اللـي تقولـه مـن وراي = ولوكنت كفو ماتقول اللي تقولـه بالخفـا
ومدام هذي هقوتك وعلومك اللي فـي قفـاي = ماهوب انا اللي يلتفـت لعلـوم هـراج القفـا
لكن انا بقول كلمـه والرجـال اللـي معـاي = ماني هنا وحدي وحنا أخوان دونـك وأحلفـا
ولاني بمجهول المكان تضيع أرضي من سماي = تعرف مكاني وأن لفيـت أقـول رجـال ولفـا
وأنا معك خصم على وضح النقى رايح وجـاي = ومن خلقة الله وأحمد الله ماحد قـد قـال أفـا
وأقسم بربي مانظرت بعينـي لبنـت قصـراي = ولا سعيت أكـدر المـاء فالمشـارب لا صفـا
كلن عرفني فالجزيرة ويش طيبـي مـن رداي = وحزامي رجـال المعـزة والشجاعـة والوفـا
أمد كفي بالسـلام لصاحبـي وأكعـم أعـداي = ولا أنت وأمثالك إلى جات المواجيـب أختفـا
لكن عساك تكون في ليني ولاتعـرف قسـاي = ماودي أبلا نفسـي بمثلـك جهـالا واضعفـا
يكفيني انك قوتك هـرج القفـا ماهـي لقـاي= وانك بفعلك تعتـرف منـت بكفـو هـذا كفـا
قلته وانا رجال وأعرف وش قداي ووش خطاي = وأعز نفسي وأرتفع عن ماقـف النـذل بجفـا
أكبر من أني التفت وارفع يـدي ولا عصـاي = وتكون في وجه السفيه اللـي كلامـه فالقفـا