انا وقديم الشوق و مساجلة خفيفة
 

.

.



اسعد الله اوقاتكم بالمسرات

في البداية وكلمة حق :

لست من يجاري شاعرا بحرا مثل قديم الشوق

ولكنها محاولة للعب مع الكبار :

في البداية ارسلت لقديم الشوق هذا البيت :


خلاص ماني متصل يابو نواف = انت متغلي وانا بالحيل قاسي

فرد علي ببيتين :


الا اتصل ورموش عيني لك لحاف = مثلك يمون وخوّته تاج راسي

مابيني وبينك يا ابو مفلح خلاف = ومابيني وبينك سباق الكراسي


فارسلت له :


الناس دونك يابونواف تنعاف= وأشرة على الغالين يااعز ناسي

ترى الغلا مابيننا شي ينشاف= العين لك مينا وقلبي مراسي


فرد علي بثلاثة ابيات :


يامبدع الكلمة ويامجمّل القاف = ويامطيّرٍ باحلى القوافي نعاسي

للشعر شعّاره وللقاف عسّاف=وفي ملعب الشعّار انت الأساسي

لا قلت قلت وصفقوا أهل الانصاف/ ولا طحت يامحمد تطيح مّـتواسي

فارسلت له :

اثبتتَ لي انك خويي وشفاف = وثبت وفاءك لي بوقتٍ قياسي


فرد علي :


رفعت بيرق خوتك فوق مشراف = وفصلت لك ثوب الغلا من مقاسي

ذكرتني يامحمد بـ ماضيٍ طاف = وذكرتني بايام فـهْـد الدباسي


فارسلت له هذه المرة ثلاثة ابيات :


حبيت أخذ مع قوافيك محراف =شلال شِعرك تحتفي به اماسي

مابيننا صعبٍ توفيه الاوصاف = تبقى صديقي بالرخا والمآسي

يبقى الوفا لك شايله فوق الاكتاف = وتبقى الوفي اللي مع الموج راسي

فرد علي :

تكفخ وانا اكفخ ونتوافق بالاهداف= ونمسك سْرانا مثل اهل التكاسي

لا انتب ابن شايق ولا نيب صياف= لكن ّ شعرك زاد فيني حماسي


فارسلت له :


ابيات شعرك وصلت ثقال وخفاف = ماكنها الا نايفات الرواسي

ودي نقفلها قبل نشة القاف = قبل النضوب وقبل وقت اليباسي


فرد علي :

بعض الشعر جزلٍ ولا يعرف اسفاف = ركنه قويّ ومايجيه التباسي

وبعض الشعر يحتاج سيارة اسعاف = وينقل لـ دكتورٍ شديد المراسي

وانا احب الشعر من كل الاطياف= حتى لو انه كان شعرٍ سياسي

بعض الشعر يورّدك درب الاتلاف = وبعض الشعر يمنحك كرسي رئاسي


فارسلت له بيت وحيد :

الشعر م الشعار يحتاج ميقاف = ميقاف فزعة ماهو وقفة مواسي


فكان رده الاخير :


تسلم وصح لسانك اضعاف واضعاف = ونّستني وطيرت عني عماسي


.

.


اتمنى ان ماكتب يشفع بتقديمه بين ايديكم

.

.


وللجميع فائق التقدير والاحترام

..

الله الله

أولها تغلي وعتاب

وآخرتها متصفح ينبض بالشعر الجميل :heart44:

التواضع سلعة الكبار

صح لسانك أبو مفلح وصح الله لسان مبدع القوافي ومهندس الشعر قديم الشوق

كلاكما رائع وكلاكما أمتعنا بهذا الجمال

شكرا لكما مدد بلا عدد

:duel:
مبارزة جميلة الفائز كلاكما ونحن الجمهور استمتعنا بها

ياهلا وغلا با ابو مفلح

في البداية أشكرك على تحريك شجوني بأبياتك الرائعة وعلى طول نفسك

كما أشكرك على نقل المساجلة من هناك إلى هنا :)

وأشكرك جميع من مرّ من هنا

شكراً لك يا ابو مفلح وشكراً للجميع

وللجميع عاطر التحايا

ابداااعxابداااع
مساجله اكثر من رااائعه من شاعرين متمكنين
تدل على عتاب المحبه. والوفاء
ادام الله الوفاء والمحبه
بينكم ولا حرمنا الله من هذا الابداع

عاد كثرو من هالعتاب عشان نستمتع فيه معكم :133:

.

.

الاخت العزيزة

بروق السحايب


كل الشكر لكِ على تشريفك وتزيين

هذا المتصفح بوجودك

لاعدمت تواصلك

.

.

تقبلي فائق تقديري واحترامي

اله اله مساجله رائعه
وسبق لي قراتها هناك ولجمالها اعدت قرائتها هنا ولو باستطاعتي منحكم الف اعجاب لفعلت ...
شكرآ لكم ولجمال حرولكم ..