حوار مع مسؤول
 

انت تعلم حضرتك ان المشكله فى انابيب البوتاجاز والمياه الحلوه وكذلك الكهرباء والقمامه التى لا تترك باب العماره والله الشارع الذى اسكن فيه يطفح على بركه قمامه والرائحه الذكيه ما شاء الله
وكل سنه وانت طيب كلها شهر وتدخل علينا المواسم انت تعلم حضرتك انا عندى خمس اولاد وكل واحد شنطه وزى جديد وكتب وكراريس ودروس خصوصيه انت عارف طبعا ان المدرسين حراميه وولكل عيل مدرس وكل مدرس اخر الشهر يشترى بيت فى مارينا !وبيقولوا فى الاخر انهم غلابه طب احنا نبقى ايه ميتين!
انا فكرت انى انتحر لكن للاسف انا جبان !
والله حضرتك انا لا اعرف النوم الناموس والباعوض ليل نهار معانا فى الشقه ده غير الفيران ما هو الشقه لها حيطان والحيطان بها شروخ والشروخ كلها فيران هنعمل ايه حكمه ربنا ده الواد ابنى بيومى مصاحب فار منهم دمه خفيف ده حتى فار ظريف ومؤدب ما يرضاش ياكل الا مع بيومى! وليس هناك حل
اسمحى لى انا عارف انى كتير الكلام لكن خلينى افضفض لك شويه
السيده زوجتى الله يعطيها العافيه حامل !العفو يعنى احنا معندناش حاجه اسمها تنظيم الاسره ولا تحديد النسل قواعد العائله تحتم ان الست زوجتى تخلف كل سنه عيل واحنا ونصيبنا بقى يطلع كويس نرميه من البلكونه ينام تحت بير السلم هوه ونصيبه!يطلع ذكى يطلع حمار اهو كله وبخته!
طول الليل مش عارف انام منها لكن تعرف الست دى استحملت كتير دى كانت بتشيل امبوبه البوتاجاز على كتفها وهى حامل فى محمود سعادتك متعرفشى محمود ده ولد عفريت عنده سبع سنوات وبيشتغل عجلاتى تصدق ولد مكافح هو اللى بيصرف على البيت !الله يديه الصحه ده محمود ده ولد يعجبك بيتاجر فى كل حاجه حتى فى هدوم النسوان والروج وعلب السجاير !اه والله مكافح ومؤره قفشوه منهم لله بس طلع ولد هرب من الكمين بعد ما خد العسكرى منه رشوه خمسه جنيه!والله الناس دول بيتعبو خالص واقفين طول النهار فى الشمس يلموا فى فلوس رشاوى يعنى الواد محمود قعد يعدلهم مره عارف العسكرى من دول بياخد كام فى اليوم من الناس يعنى قول سعادتك كده الفين جنيه ده فى اليوم والعجيبه ما بيشتغلوش وبيعملوا مظاهرات بيطالبوا بتحسين الاجور !


وعندى كمان جلال بيشتغل اه انا علمت اولادى الشغل كلهم وفى نفس الوقت بيتعلموا جلال بقى ولد مكافح عنده اثنى عشر عاما بيشتغل صبى ميكانيكى لكن ايه عشره على عشره لكن فيه مشكله صغيره كل يوم والتانى اروح معاه القسم اصله بتاع مشاكل بس ولد ظريف هيه مره واحده اللى قومت له محامى طلع صاحبه خد منه تلاتين جنيه وعلبه سجاير روزمن وحبسه اربع ايام !
تصدق ان الواد بيفهم لما غلبان زيه يتحبس اربع ايام والناس اللى سرقت الملايين عايشه فى نعيم ده عويس واحد كنت اعرفه سرق البنك اللى فى اخر الشارع كان فيه كام مليون وبقى رجل اعمال وعليه تلاتين قضيه ومامور القسم بيشرب معاه الشاى كل يوم بلد اللى يسرق فيها رغيف عيش يبقى لص واللى يسرق فيها الشعب يبقى رجل اعمال!ويتعمله تمثال!

حضرتك مستعجل انا خايف اكون معطلك
والله انا عندى كام مشكله لو تسمح لى يعنى
الزباله قدام العماره والمياه اللى دايما مليانه صراصير والكهرباء اللى دايما بتقطع والمجارى اللى دايما طافحه والعيشه اللى زى الغلب كلها نكد فى نكد ونفسى لو تسمح تقول للحكومه فيه واحد يقرب للوزير ساكن جنبنا الكهربا مبتقطعشى عنده ابدا وبيشرب ميه معدنيه حتى الواد ابنى بيروح يذاكر تحت لمبته لما النور بيقطع عندنا وفى مره طرده عشان الكلب بتاعه كان بياكل لحمه ونفسيته تعبت لما شاف بيومى واتعالج فى باريس طلع عنده اكتئاب! والنبى قول للحكومه تعمل لنا عماره زيه النور فيها ميقطعشى وتجيب لنا كلب حراسه زى بتاعه ونشرب ميه معدنيه زيه يعنى لو سمحت يعنى

والله انا حاولت انتحر بس انا طلعت جبان
والله فيه مشكله كمان مرتبى زى ما انت عارف ما لوش لازمه ولولا العيال بيساعدونى كانت حياتنا بقت سوده اكتر ما هى سوده وحاولت اعمل مظاهره واعتصام زى الناس لكن انت عارف انى جبان !ومسالم
انا عارف ان سعادتك مستعجل
والله انا متاسف اكون بعطلك !
البنت حنان بنتى انت طبعا متعرفهاش كانت عيانه بمرض غريب والله ماتت من قله الفلوس والطبيب كان قليل الادب خالص لكن ام العيال اصرت تخلف غيرها وتسميها حنان برده استبن يعنى !
مش ممكن سعادتك الحكومه تعمل مستشفيات للغلابه زينا يعنى والعلاج مجانى !
ولو تكرمت كمان يشيلوا الزباله اللى قدام العماره وكمان نشرب ميه حلوه والكهربا متنقطعشى تانى اصل الواد محمود بيخاف ينام فى الضلمه !بيجيلوا صرع وبيهلوس وبيقول كلام غريب ده ساعات بيقلع بلبوصه فى الشقه وبيجرى فيها ويصرخ ويقول كتاكيت انا عايز كتاكيت!وبصراحه راح لدكتور طيب فى اول الشارع قال لنا انه عنده مرض فراخى!ولازم يكاكى كل يوم الفجر زى الديك والمرض ده مالوش علاج الا بره فى امريكا فياريت تشوف حل له لان المساله طولت معاه دحتى اليومين دول بقى بيمأمأ زى المعيز!


ولو سمحت يعنى تكلم الحكومه ترفع مرتبى شويه ده مبيكفنيش عيش حاف والله !
انا خايف اكون عطلت سعادتك!
ولو تسمح تصورنى انا وبيومى ابنى الصغير اصله مريض جدا وتعرض صورتنا على المسؤولين ده هيفرح خالص اصله بقاله كتير ما تصورشى كان اتصور فى فرح بالصدفه والعريس مسكوه بطربه حشيش وربنا ستر وما سالوش مين اللى معاه فى الصوره

بيقول الدكتور عايز عمليه بخمسين الف جنيه وانا يعنى ممعيش خمسين قرش عموما الحقوه قبل ما يموت زى اخته ولو مات مش مشكله ام العيال هتجيب غيره !
ولو تسمح تقول للمسؤلين ان السرقه انتشرت اليومين دول وكل يوم العماره تتسرق والحراميه يدخلو شقتى يلاقوها فاضيه الله يسترهم بنصعب عليهم يسيبولى فلوس لله ويمشوا !الواد محمود بيفرح لما يكون فيه حراميه بيسيبولنا مبلغ محترم من المال الله يسترهم!ده حتى محمود كان نفسه فى اللحمه عمره ما داقها حرامى محترم ابن حلال صعب عليه راح سرقلوا الجزار اللى جنبنا وجابلوا فخده جمل البيت كله هاص فى اللحمه وام العيال دعت لهم فى الفجر ربنا ينصرهم وما يعترشى فيهم البوليس !
ده حتى محمود اتصور جنب الفخده وهو مبسوط اهى للذكرى!الصوره معايا لو تحب تشوفها سعادتك!

ولو تسمح تقول للشرطه كفايه نوم بقى ويشتغلوا شويه واللى فات مات والمسامح كريم!
كان الواحد زمان بيعيش فى امان وكان كل متر فيه كمين !
والله انا خايف اكون معطلك !
انا عارف انك مستعجل
انا متاسف والله لكن يا ريت تقول للحكومه والبرلمان والرئيس فيه ناس كتيره فى البلد دى مش لاقيه رغيف العيش وبيناموا فى قلب المجارى وحياتهم الموت احسن منها وبيتمنوا الموت مش لاقينه
وان كل المشاريع والكلام اللى بنسمعوا انهم بيعملوه وهيعملوه ما لوش لازمه لان البلد دى اغلبها فقراء مساكين ومشارعهم واحلامهم مالهاش علاقه بالفقراء امثالى
معلشى حضرتك انا خايف اكون معطلك هما كلمتين وكنت عايز اقولهم لاى حد مسؤل وعارف انهم مالهومشى لازمه لكن اهو تخليص ضمير

السيد الحسيسى
محامى وكاتب مصرى
عضو اتحاد المحامين العرب
عضو الجمعيه المصريه للقانون الدولى
عضو دولى بمنظمه العفو الدوليه
ماجستير فى الشريعه والقانون
باحث اسلامى
عضو اتحاد الكتاب باريس

يسلمووووووووووووووووووووو