واونتاه اللي من العام للحين = وا فوح كبدي .. وآآآآآه .. و عزتالي
وا بري حالي كل ماقلت بتزين = عيت تزين وصحت وا بري حالي
البارحه ما امسيت والناس ممسين = عيني قزت والقلب يصلاه صالي
يرجف ورجفه كنه عيار خمسين = مع هيلعٍ عند اللقا ما يبالي
وانّس بكبدي مثل طعن السكاكين = ولا حدٍ فطن ياخوك للي جرالي
تخالفن ياخوك كل الموازين = والحمل كايد واحتملته لحالي
انا اشهد ان الموت ضيم الموالين = والغدر امرّه من رفيقٍ موالي
والخدش كبه لو رصيده ملايين = وانصّ الولد لو ما بجيبه ريالي
تمقلي ياعين دامك تشوفين = وتوكدي حرام والا حلالي
السيل سال وشال روس وكراعين = والله يثبت راسيات الجبالي
وحنا على درب المقادير ماشين = ولاحدٍ درى عن غيب سود الليالي
يامن ترى وتشوف وتروف وتعين = ابطلبك يا من عليك اتكالي
انك على درب السلامه تقدين = وتلطف بحالي ياعزيز الجلالي