ياوقت انا عارفك بالمدة كريم = لكن مداتك تجي سمٍٍ ذحاح
جودك بجرح القلب وطعونه قديم = ما هو غريبن منك تجديد الجراح
دايم سيوفك وارداتن فالصميم = ولا يوم قلبي من بلاويك استراح
تحدني والدرب ماهو مستقيم = وتعقد اللي بالعزم للمجد شاح
لكن انا حالف وبالله العظيم = ما هزني زرقك لقلبي بالرماح
اخترتني وانا معك نعم الخصيم = ما والله تنول النصر وتقول:طاح
واللي جعل موسى من العالم كليم = لاوقف بطل واهد ليلك بالصباح
مدام ليلك يخدشه نور السديم = مهزوز عرشك وانتصارك فانزياح
دام الفكر والدين والمنهج سليم = وش عاد لو الكلب كثر فالنباح
ولو ولعو بالنار فاطراف الهشيم = ترى الجبال الراسية صعبن تزاح
ولوصدقوك اخدوش واطفال وحريم = ماهو دليل اني غدا حدي مباح
ترى الحدود محصنة وانت اللئيم = ولا كل شخص يخوفه بعض الصياح
والدرة اللي موجك وبحرك لطيم = من دونها جت وانتختني بالسلاح
قلت ابشري يادرة القلب السقيم = بجيوش شوقن جت تلبي باجتياح
تترك عظام الوقت لعيونك رميم = وتحول بروج المعادين لبراح
يا عربدة فكري ليا هب النسيم = مدام عطرك فاح كل الشوق فاح
يا غيث نبت الولف وحدود النعيم = ما هو خفين نوض برقك يوم لاح
انشي مزون الود واغشيني بديم = وعيشي بنون العين وبكل ارتياح
وانسي بصدري كل ظلم وكل ضيم = دامك وردتيني فانا كلي قراح