سلام ياللي مرسلٍ صوبه حروف= متعب كبير البيت زبن الونيه
ارسلت لك قافٍ من الهم مرصوف= خابرك انا ياخوك راعي الحميه
جيتك وعيني دمعها اليوم مذروف= بفرقا ضنيني اليوم روحي شقيه
ماجيت ناسٍ حكيها دوم معجوف= اخاف من حكي الشواميت فيه
اخواني اللي كنت اظن درع وسيوف= وقت الشدايد بالامور القويه
ماشفت انا منهم سوى عرض الكتوف= مامنّهم اللي عنالي بجيه
وقت الحوايج حولي الكل ملفوف= محدٍ تعداني صباح ومسيه
ويومٍ حصل ليّه من الوقت عاصوف= محدٍ رفع خطه ولا دق عليه
امرٍ خفي واليوم واضح ومكشوف= ماكن من بعده لي اقراب حيه
من ماوقف في وقت عسرات الظروف= بالعمر محياه ومماته سويه
لاصار في ضيقات الاقراب مايشوف = ويجعل قضيتهم لنفسه قضيه
ماعاد به خيرٍ ولا فيه معروف= وعزّي لحال اللي علومه رديه
وانا يا متعب مجفل ٍ صابني الخوف = مصايبي ياخوك ياهي قويه
جتني بلاوي دنيتي اليوم بصفوف= نفسي كسيرة كانك تحس فيه
ماجيت صوبك كود مربوط الكفوف= مالي حد ٍ غيرك عوين لخويه
جيت اشتكي لك من عنا الوقت مرهوف=بيني وبين الهم اخذ وعطيه
مالي بكم ياخوك غايه ومهدوف= ياكود جيتك حامل ٍ لك وصيه
الموت حقٍ سنة الكون معروف= وامي تراها اليوم ماهي بحيه
وشوفت عيونك حالتي تقطع الجوف=انا اشهد انها قربت لي المنيه
قضيت عمري بالتقارير مكلوف= عند الاطبه بين روحه وجيه
جسمي رعا وامراضي تحوفني حوف= ولالي على زادي ابد قابليه
حالي عليلٍ منحني الظهر معكوف=ازريت من شيل الحمول القويه
وطالبك يامتعب بعد موتي تروف= باخوان ..... واعتبرها زكيه
دفعة بلا ياخوك مامنّها حسوف= تلقى جزاها عند رب البريه
وترعا اليتاما من بعد يطفي الشوف = لعلني اصفا بموته هنيه
وان ماحصلي منْك ياخوك مسعوف= لاحول ولا قوة انا وش بديه
انا برجا اللي يطرد اللهم والخوف = اللي فدا ابراهيم كبش الضحيه