عيشي حياتك بعيدة عني وروحي = واللي مضى بيننا أرجوك تنسينه
ما أنكر إنك بفترة كنتي طموحي = لكن قدرتي بإهمالك تهدينه
مانالني منك الا همي وتروحي = وحزنٍ بقلبي تغلغل في شرايينه
وخذيتي مني خفوقي وفكري وروحي = ونومي وحلمي وعمري وأجمل سنينه
يعني عشاني خفيف الدم ومزوحي = بتخربيها معي يابنت مسكينة
بأقلبها وياك جد وأترك مزوحي = وأعلمك كيف ثقل الدم والطينة
بأطردك من جنتي وأطردك من دوحي = وخلي عذولي يضمك في بساتينه
وبآخذ قضى طعنتي وآخذ قضى جروحي = وأسقيك من كاسٍ أول لي تسقينه
مليت ألمح بهمي لشخص ما يوحي = تشوفي حالي وكنك ما تشوفينه !!
واليوم قررت أعلن للملا بوحي = وأفضحك عند الحبيب اللي تخدعينه
من حب مثلك ولو من دون مصلوحي = أن أشهد إنه حفر قبره بيدينه
واعزتاله غدى في النار مطروحي = وأسأل مجرب ما أقول الا الله يعينه
كفي مدامعك لا تبكي ولا تنوحي = مايفيد دمعك نصيحة لا تهلينه
الراس يابس ولا أحدٍ يكبح جموحي = لا أنتي ولا اللي على رقمي تدزينه
مادمتي ذنبٍ كتبه الله في لوحي = بأقلع عنَه حد ربي بيني وبينه
ومالك أمل في رجوعي أذلفي روحي = واللي مضى بيننا أرجوك تنسينه