وأدري بعد لا مَدّ طفلٍ بيمناه=على عباتك وسط سوقٍ وجيره
قلبك خفق ترجين من فمه ماماه=يقفي وعينك تزهمه تستجيره

كِفّي دموعك وإتركيها على الله=وخلّي الحكي لأهل العقول الصغيره
إذا عطانا الله نحمد عطاياه=وإذا حرمنا الله .. نعمه وخيره
صحيح نفسي في صغيرٍ ونرعاه=أمّا ( وَلد ) .. ولاّ ( بنيّه ) صغيره
أدري قليبك يا حبيبة تمنّاه=وأعرف شعورك لا طرولك بسيره
أهل الحكي يا بعد روحي والأفواه=ناسٍ تعيش الجهل تهذي هذيره
وأدري بعد لا مَدّ طفلٍ بيمناه=على عباتك وسط سوقٍ وجيره
قلبك خفق ترجين من فمه ماماه=يقفي وعينك تزهمه تستجيره
ويزيد همّي لا سرى الليل مسراه=إذا نظرتك نايمه كالكسيره
وجدك على شوف الصغيّر ولاماه=وجدٍ يهدّ جبال طيّ وعسيره
لو إن سلمى مرّها منك مرّاه=على آجا تلوي وتبكي مريره
أرجي اللذي ما خاب منهو ترجّاه=ربٍ كريمٍ عالمٍ بالسريره
دامك معي والله مبغاه مبغاه=شيٍّ يكدّر خاطرك ما أثيره
إنتي لي الطفله وإنتي صباياه=وأنا خذيني طفل وإمسي قريره
أغضبت كل الناس شاعر ومعناه=يرضيك لو يغضب قلوب الجزيره
في مجتمعنا شي صعب انتحاشاه=ماهو بدين وسلم عند العشيره
الزوج وأهله لا مضى عام عيباه=قالوا تزوج غيرها لو غريره
نبي نشوف عيالك العمر ما مداه= وأهل المَره من صوبهم في سعيره
يصدّق المسكين وتزيد بلواه=وياخذ عليها في حياته خشيره
يعيش في زهوٍ ويختال ممشاه=ويعذب الثنتين ليل وظهيره
قصده يجيه أولاد أقصى تمنّاه=يسمع مديح العِجز لا راح ديره
ما خاف ربّي في ضعيفات ليلاه=عاشَن على كيفه بحسبه وغيره
أم الولد يمكن تناديه بابناه=وهذيك تبقى (شي) فيده مصيره
إما تعيش الذلّ ولا تحرّاه=ولاّ يطلّقها وتهجر سريره
ولأهلها ترجع وتلقى معاناه=أقلها نظرات شك ونذيره
إذا بغت تطلع على بابك الله=الكل يرفض رايها ما يعيره
ما عندها محرم ولا بيت تلقاه=وإثباتها أوراق تلزم حضيره
بالمجتمع تصبح ضحيّة حكاياه=مطلّقه تهمه وتصبح جريره
كِفّي دموعك .. واتركيها على الله=وخَلّي الحكي لأهل العقول الصغيره