يحق لك تضحكين وهاجسي له مدار = يبحث ورى لمحة عيونك ودمعاتها
طلبت تكفين وانتي من بيده القرار = ما احكم على رغبتك واخلف مساراتها
العين منها المنايا ماعليها غبار = ترسل لي جيوشها وتشن غاراتها
لمحة تشابه ولكن التفاته يسار = واخاف لا اخلف بوعدي ناتج سكاتها
يا سكّة العشق بين قلوب هل من مسار = ايحدد الموقف اللي فيه بصماتها؟
لو قايد الغيد ينطق كلمته لي جهار = ماتهت في عالمي وارقّب لاشاراتها
استحلفك بيّن الكلمة ترى لك وقار= الفكر يسرح بروحتها وجياتها
ان كان قصدك تعذبني بليل ونهار= احكم علي القصاص بحسبة امواتها
وش قلبك القاسي اللي زوّد النار نار= والنار تحرق ضلوع وصبرها فاتها
يانظرة العين صمتك للحروف احتضار=من حزنها احزن وضحكاتي لضحكاتها
معقول قصدك تبي مني يطول انتظار؟ = والا تعمدت لي اطوي ملفاتها ؟
بيني وبينك مسافاتً وغزر البحار = ليتك تسمّع لروحي كثر وناتها
يجبرني الصمت عنك اني اقرر فرار= نطقك جمال الطبيعة وانت لذاتها
وشلون حطيت من بيني وبينك ستار= اشهقك فرحة وفي الاحزان زفراتها
معقول ترضى يصيب الروح منك الدمار ؟= افعل بها ماتشاء واعلن نهاياتها