قالت انشر بالجرايد قلت مب غاوي جريده = والمحيطين اتعبوني يرتجوني بالمكانه
قالت اوزن بالقصايد قلت مو هاوي قصيده = خايف الذنب امتطيني بعد موتٍ في زمانه
شاعرٍ أوصف شعوري ابقصيده لي جديده = جا أبو نوره يبيها أو رويشد دَنْ دَدَانه
باصمٍ اسمي أنا كاتب نهاياتٍ سعيده = هو طلب شهرة مكاسب من فراغٍ ، سد وخانه؟
كاتبٍ عمر الهوى بينك وبيني ذي شديده = لحظةٍ في موقفٍ أو مشهدٍ يُعرض بحانه!
في قصايد وزنها صالح معانيها حميده = مو عميقة أو مضامين المعاني مو مُصانه
وابقصايد وزنها طايح معانيها رشيده = تحمل المعنى عميق وترفع الشاعر وشانه
احترامي للمعالي والعصامي ما أزيده = من كلامي له سلامي ما نسيته لك أمانه
معجباتي يا فتاتي أي حروفٍ لي شريده؟ = اتهقوني من ظنوني لو سمحتولي ميانه
معجبيني يا شرف لي ع الجبيني ما أبيده = هي هوايه أو غوايه أو تخاريف الزيانه
في تعاريف الخيانه لو تقوليها عقيده = إن تَعَرفيها خيانه من حروفك جد رَزانه
ما بقى لي من كلامك اعتذارٍ أو أريده = انتظاري أو قراري باعتبرهم لك حَصانه
قالها لك شهريار وْتكتبي ما لا يعيده = لك أصون وما أخون وتكتبينه هو حِصانه
يشهد الله ما عرفتك من قبل خلتك عنيده = يحفظك لي خالقي هو خالقك حُسنٍ أزانه
بوهبك من هالقصايد بالسعادة لك مديده = يا قلوبٍ افتحت قلبٍ قفلته للصيانه