يا ربي عطني القدرة = بأني أكتب المرسال
وعطني من البحر قطرة = تصب بداخلي شلال
وكوّن عندي الفكرة = ببينها على الأجيال
عيوني هلت العبرة = ودمعي من بعدها سال
كتبت الحب كم مرة = أبكتب غير ذا الموال
أبكتب داخلي حسرة = عن المظلوم والأحوال
عن الظالم وعن شره = عن الكذاب والمحتال
بنات أطفال منقهرة = ورب الأسرة هد الحال
وكل أوقاته منحصرة = بأنه يجمع الأموال
بنا نفسه بنا قصره = ولكنه هدم آمال
يا بخت اللي عرف قدره = وتوج صالح الأعمال
تمنى وأنشرح صدره = وهمه من حياته زال
بها الدنيا نجي مرة = ولو فات العمر أو طال
وهذا شايفٍ عمره = عيونه بالسما مختال
ولا شماغٍ ولا غترة = تخلي الغافلين رجال
ولا بنتٍ بها سترة = وداخلها مثل تمثال
سعاد تفتح البشرة = منى مشغولة بالجوال
من اللي يدري عن أمره = متى بيموت أو يغتال
أبد ما نخاف من سكرة = توقف نبضنا بالحال
ترا الدنيا بها شفرة = ومعناها يهز جبال
براكين وبعد بكرة = تجينا صرخة الزلزال
ومد البحر أو جزره = كسوف الشمس والأهوال
وريحٍٍ فجرت صخرة = وموجة دمرت أميال
يا دنيا هذا وش سره = غضب ربي من الأعمال
ترا أصل الشجر بذرة = تعيش وتحتوينا ظلال
تزودنا ورق خضرة = وتغمرنا فرح وآمال
وهذا النوع بالندرة = تلاقي منّها أمثال
وجذعٍ قاسيٍ جذره = ورق يابس عليها شال
وذا تلقاه بالكثرة = عديم الفائدة همال
وذاك اللي حفر قبره = بنفسه يرمي الأفعال
يحسب إن الفعل جمرة = يطفيها بدفن رمال
شعار وبكتب بسطره = بكلمة بعد ضاد ودال
نعيش وكلنا أسرة = ونعرف منهم الأنذال
وإذا الأغصان منكسرة = تأكد ما يموت العال
كثير أشواك منتثرة = من الكافر علينا أشكال
ندوس ونخفي النظرة = نعديها بكل إهمال
ما ندري باللي ننتظره = بلحظة كنا فيها اغفال
كفانا من العدو غدره = كفانا الظلم والإذلال
نسينا محمد الدرة = نسينا كل ما في البال
نسينا إن العمر فترة = نعيش وبعدها ترحال