لا الصبر ينفع ولا ذا الليل له آخر=و ماعدت انا اقوى على حملي و آلامي
يا ليتني مشتكي من حظي العاثر=و يا ليتني مشتكي من زلة اقدامي
يا أسعد اليوم انا في دنيتي حاير=ما جيتك الا و هي قد جفت احلامي
الصمت يصرخ و جمر الحزن بي ثاير=و ريحان عمري ذبل من عدة اعوامي
البارحه يالخوي مر الألم زايـــر=و اسقاني الهم من كاس العنا الدامي
مدري وش اللي جرى و بحالتي صاير=لكن تركني و مازلت الهث و ظامي
رمح الليالي بصدر شموسها غاير=و الموت دمٍّ جرى بعروق أيامي
و لا شفت جفني معا بدر الدجى ساهر=لا تحسب ان الهوى بسبابه اسقامي
لاني عشيق ٍ و لا مسحور أو ساحر=و لا طريت المها في معجم الهامي
لكن طرى هاجس ٍ مثل البحر هادر=يحمل شعوري على موج ٍ كالاعلامي
و سرب المعاني هجم مثل الوَحَش كاسر=و جات القصايد على الموعد مع اقلامي
يا أسعد افهم ترى وجه الألم سافر=و الدمع يوم انتثر ماهو من اوهامي
بي ضاق وسع الفضا و بالغدر انا شاعر=خلفي ضياع و ندم و الويل قدامي
و الفرْح في دنيتي مثل الوفا نادر=و اصبحت عقب الأمل عايش بالاوهامي
ماهو أنا اللي جنى مير الزمن جاير=و يا ويل حالي و انا مذبوح بسهامي
بيدي بريت السهم و اعطيته الغادر=كنت احتمي به و اثَره لقلبي الرامي
ودي يعود الذي عن دنيتي سافر=و اسأله عن دمعتي و اسباب آلامي
منهو بدى...و انتهى..من بالخطا جاهر=منهو بريٍّ و من في فعله اجرامي
منهو كسب جنته و في ناره الخاسر=و منهو بناها و علا و من كان هدامي
مير التمني عبث و ادريبها عاهر=دنيا بها ونِّتي و الليل ظِلاَّمي
مليت انا يالخوي و لزوم انا اهاجر=عل و عساه الهنا داري و هندامي