عيون نعسانة على شاشة إل جي = والخد لونه مثل ألوان الأزهار
في وقت ليل ن كان نور السراجي = يرسم حدود الظل من شعلة النار
في داخل الشاشة وذاك السياجي = حطيت ايدي بلمس الخد محتار
هذا طبيعي ولا خلف الزجاجي؟! = من حسنها جابت لي أفكار وأفكار
في عينها رمش ن وخيط ن بنسجي = في وجهها نورٍ مثل شمعة الدار
بسماتها كلماتها لو تناجي = تسكت عصافيرٍ تغنت بالأسوار
جات أسألتني ودها بانفراجي = شافت وحسّت ضيقتي ليل ونهار
أول سؤال (ن) كان عن اسم برجي = ثاني سؤال ن كان وشفيك وش صار
جاوبتها قلبي بدون احتجاجي = ناوي على قلبك يخاويه مشوار
برج الحمل برجي ولا به عجاجي = كله أحاسيس ومحبة وأنوار
حتى اسألتني عن جميع احتياجي = ما هي بجارة وأوفت الحق بالجار
في صدرها شفت الخفايا علاجي = بحرٍٍ عميقٍٍ يغرقه كل بحار
مو بس أنا أغليها وأجامل بهرجي = مير أسكنت دمي مثل جري الأنهار
أشواق مشتعلة وملهوفة ترجي = وهموم منثورة على الصدر تنهار
شفت الألم فيها وزاد إنزعاجي = رغم ابتسامة ثغرها كل الأمرار
وعدتها بكتب لها من مزاجي = وأكتب لها في صفحتي أحلى الأشعار
نويت ابهديها من الهند عاجي = حتى من البحرين مرجان وأسوار
واحطها بيدي على الراس تاجي = وارسمها في قلبي وأخليها تذكار
بس انها ترفق وتفهم بنهجي = وتقول ما تكتم على خالد أسرار