راح حول وراح فوق الحول حول = والجروح الخافيه عيّت تطيب
والزمان الشين عيّا لا يزول = وضاقت الدنيا على الكون الرحيب
عايش وكني عن الناس معزول = لاحبيب ولا رفيق ولا صحيب
ماخبرتك ياهوى بالي زعول = ليه طبعك صار ياخلي غريب
والله اني ماشيٍ حسب الاصول = ما مشت رجلي على دربٍ يعيب
ماسمعت الناس لو عنّك تقول = ولا دخلني فيك لا شكٍ وريب
غرك اني دايم بشعري اقول = أنت الأول وأنت لي آخر حبيب
الليالي بيننا قامت تحول = وأنت أشوفك تالي أيامك تغيب
للمفارق صايرٍ عندك ميول = وأنت تدري فالحشا جرحك عطيب
لكن الدعوى تراها ماتطول = دام مالي فيك حظ ولا نصيب
عادة الدنيا لها أربع فصول = وشمسها تشرق ويتليها المغيب