مشتاقلك وأنتَ معي شوق الصحافة للخبر = ولهان يا أحلى بشر شفته وتوّه ناظري
هذا ترا وانتَ معي وشلون لو غاب النظر = لأنشد وأقول بْصرختي عنك بصوتٍ جاهري
وينك يا قطرات الندى وينك يا زخّات المطر = بغيابك القلب اكتوى وينك يا غاية خاطري
لو غبت عن شوف العيون الدمع ثوبي والقهر = ارجع لي يا عمري وأنا كلي ندم يا هاجري
صوتك يواسي مهجتي يهمس مع أمواج البحر = يهمس على سمعي يقول بْكلمتينٍ حايري
(يا خالد اسمعني ترا قلبي لحبك ما غدر = بس القهر ظلم الزمن جرحٍ بجوفي ما بري)
صوتك سمعته يا حبيب العمر يا أغلى البشر = حتى الحجر ردد صداه بْأمر ربٍ فاطري
انتَ مع الأمواج ترسل لي مواعيظ وْعبر = أوتار يعزفها أمل من نبض قلب ٍشاعري
لا منه الموج اعتلا بللني بحرك واعتذر = وإن صار ساكن نبرتك غنت بلحنٍ ساحري
طيفك رسمته بالسما في خد شمسي والقمر = حتى جفونك شكلها كنّه سحابٍ ماطري
أنهار من شعْرك على كتفك تصب اللي هدر = لون الذهب خصلاتها مثل العقاب الكاسري
عينك كساها رمشها غيّر ملامحها سهر = كل يوم تتحدى القمر حتى الصباح الباكري
والجسم وردة نايمة مزروعةٍ بين الصخر = أدفق على سيقانها من نبع نهرٍ فاتري
والنسمة من عطرك تجي تنثر على دربي زهر = جنة بشوفك دنيتي والليل بأرضك سامري
قلبك خضر دمك عسل كلماتك الحلوة درر = بقدومك الروح اعتلت مثل الحمام الطايري
من يوم غابت بسمتك همٍ على حزني حضر = ما ذقت طعم النوم أنا صاحي ولجلك ساهري
بس أنتظرها رجعتك وأحصد من عيونك ثمر = لا تزيد في هجرك ترا حالي كسير ْوصابري
تعال واضوي شمعتي بعدك تراني في خطر = هذا ترا وانت معي زود اشتياقي حاضري