كل ما ون قلبي جاوبن الضلوع =من هنوفٍ سلب عقلي هدب عينها
كن في عينها وان ناظرتني جموع =حفرة الموت في مقرن حجاجينها
جا نهار الخميس وفات يوم الربوع =والوعد طاف والأقدام مشقينها
حفيت اقدامنا والعين تذرف دموع = فرقا الاحباب لو يومين ياشينها
يامليح الكلام ويا حسين الطبوع =صورة حافها الرحمن يازينها
فيك من ظبي نجد اوصاف واحسن رموع =وانتم اللي كبود الناس كاوينها

أبـرحل والله العـالم وش إللــي بداخلي من شوق=وابـطـوي صـفـحـة عـيا زمـان الـعمـر يطـويها
أبـرحـل تـايـه بـغـربه وطـن مـالـه عليه حقوق=وطــن وحـدوده عـيـونـك ودمـع حــايـر فـيـهــا
أبرحل دمعة حارت من أدنى الموق لأقصى الموق=خـذلـهـا الــوقــت يـوم إنـه حـرمـها من هقاويها
أبــرحـل وأجـمـع آلامـي وابـرقع ثوبي المشقوق=وأبـفـهـق عـن دروب الشـك رجـلـي قـبل تمشيها
أنا أدري إن الزمـن قاسـي وأعرف إني بليا ذوق=ونـفـسـي يـوم ودعـتـك رمـت فــي النار رجليها
عـمـر هـالحـب مـايفـنى مـدامه في الحشا مخلوق=ولــو دنـيـا الـعـنا جـارت وورتـــنـا بــلاويـهـا
أبنـسـى آه كيف أنسـى وأنا إللي من زمن محروق=أكـذب كـاننــي قـلـت أقـدر أنـسـى بعض ماضيها
الا يـاحـظـي الـمـقـفـي عـلامـك لـشـقـى مطفوق=أنـا طـالـبـك لاتـفـتـح لـعـيـنـي ســـد واديـــهـا
أبـنـسـى كـيـف والـذكرى وسط قلبي تسوقه سوق=هـذا طـيـف عــاتـقــهــا وهــذه رجـفـة إيــديـها
أنـا فــي ذمــة الله مــاعــلــي مـن الشقا والعوق=أنـا فــي ذمــة إللــي لاقـبـض هالــروح يحــييها
جـعـل عـيـن بـكـت مــن حب أبد ماتنحرم من موق=ولاتـفـقـد ولــو طـالــت ليــالــي الـهـجـر غاليها
وعيـن خانـت العــشره عساها بأمر الولي من فوق =عـسـاها فـي زمــان دبــرتــه ضــاعـت خطاويها
وأبــرحل والله العـــالم وش إللي بداخلي من شوق=وأبـطــوي صــفحــة عــيــا زمـان العمر يطويها

على ذكر المواجع والسفر والحل والترحال=طويت آخر ورق عندي بقى في دفتر أحزاني
طويته وانكسر قلبي وصوتي بالمواجع سال=ودريت ان الظلام اللي تحت كف السهر جاني
جلست أجمع مسافاتي وأغني للسفر موال=على صفحه من الماضي بها حلمي وعنواني
بها كم سافرت عيني ليال والظلام أهوال=وبها كم سافرت روحي وانا بالليل وحداني
حبيبي ليلة البارح مشيت من الغرام أميال=واناظر رحلة الذكرى شعرها لين غطاني
جلست أمشط ضفايرها على كتف الظلام وطال=تخيل من شعرها كل خصله لي وطن ثاني
حبيبي كل ماشوفك تجي بالذاكره تختال=نهر من فايض الذكرى يجي من داخل أشجاني
تخيل يوم عانقني خيالك خاطري وش قال=تخيل قبل اسولف لك سالني عنك وجداني
نشدني لين خلاني مدينه هزها زلزال=تخيل ماهدى حتى لقاك بوسط شرياني
أروح لسدرة الموعد معاي لجيدها سلسال=واخاف انك تجي قبلي وترحل قبل تلقاني
هنا كانت ليالينا غلا والمقبلات آمال=وهنا كانت مواعيدك مطر تخضر به أغصاني
هنا كانت نواظرنا سوالف في كلام أطفال=وهنا كانت عصافيرك على دربي تحراني
هنا شف باقي آثارك على رمل الوعد مازال=وهنا شف دمعة طاحت من عيونك علشاني
حبيبي لاتنشدني عن أوضاعي وكيف الحال=أنا بعدك سراب أبيض اضم الريح باحضاني
غلاك بدلة الذكرى بهار وهاجسي فنجال=تقهواه الجروح اللي بها ذكراك تنصاني
تسافر بي واحسب اني وصلت آخر وطن بالبال=واثرني ماوصلت الا بداية درب حرماني
وتبقى سيرة الذكرى قصيدة تكتب الترحال=سوالف للعيون اللي صداها دمعة أحزاني

تعالي نسكت احـسن من كـلام تالـيـتـه جـروح=هلا بالصمت دام الصمت ما يجرح مشاعرنـا
انا وانتي وطول الصمت والدمعه وكثر النـوح=ولـيـل مـا بــقـى بــه حـيـل يـنهـانـا ويـامـرنــا
بـكـى مـا كـنـه اللي كان يغرينـا فـرح ومـزوح=سـكـت مـاكـنـه الـلـي كـان مـلهمنـا وشاعرنـا
تـوحـي تـسـمعـيـن الليـل مـدري اشبـلاه ينـوح=عـلـى ضـحـكـاتـنـا ولا عـلـى كسـرة خواطرنـا
اذا يـبـكـي من الفرحه علينـا ..علميـه يـروح=واذا يـبـكـي حـزن تـكفيـن قولـي لـه يسامرنـا
ويـجـبـر خاطر قامت هواجيسه تجـي وتـروح=يـشـوف الحال ويـكـف السـؤال اللـي محيرنـا
صـحـيح انـا صـبرنا واعتبرنا صبرنـا مصلـوح=ولـكـن..مـا بـقــى شـي عـقـب هــذا يـصـبرنـا
دخيل العاتق اللي لـه ورى ليـل الجديلـه روح=وفـي جــاه الـشـفـاه الـلـي بـنسمتهـا تعطرنـا
وفي وجه العيون اللي بقى للدمع فيهـا روح=لاجـل خـاطـر لـيـالـيـنا..ومـاضـيـنـا وحاضرنـا
تعالي نسكت احسن من كلام تاليتـه اجـروح=نحب بصمت..دام الصمت ما يجرح مشاعرنا