قال المثل مايحجب الشمس غربال=يافاهم الأمثال هاك اتحليله
من واقعٍ ملموس ماهو تِخيال=ولا ينذكِر قولٍ بليا دليله
واقع قرانا فيه تفكير واقوال=ناسٍ تدور للقشر وتعديله
وكثرو نواقيله هل القيل والقال=كلٍ يحاول قدح زند الفتيله
لكن مالقيوا لهم فيه مدخال=ماحصّلوا غير الزّرا والفشيله
رفرف علمنا غصب عن كل الانذال = وكبودهم تشوى بنارٍمليله
بان الصحيح ومات حاسد وعذال=والما يبين ولا تغطه نثيله
في ملتقى الهيلا يبرهن بالأفعال=واللي مشكك أظهر الله حفيله
شيٍ يفوق الوصف مامثله محال=مدينةٍ تبنى وتسكن بليله
تجمعٍ تبهجبه النفس ويخال=اخيال برقٍ من صدوق المخيله
تبى تدور سنين واجيال واجيال=ماواحدٍ فالخلق سوّى مثيله
فعل الرجال اللي تشرِّف وتجتال=بين المكارم والفعول الجليله
قومٍ لهم في ذروة المجد منزال=بعزومهم ماتصعب المستحيله
قبيلة يضربها امثال وامثال=فالمعجزات النادرات الثقيله
لطامة العايل ولا كل من عال=يسلم من اللطمات ويعز حيله
رجالهم ينطح ثمانين خيال =مايعرف الذله ولا فيه ميله
سطوة شجاع من السطر فوقهم جال=ومن العدو مرهي وضامن حصيله
من حس بطعون وعلاه الزمن مال=ادنى عتيبي يزبنه ويحكيله
يلقى البشاير والشحم جيبله فال=تذبحله الحيل السمان القليله
من اول الدنيا وباقي ولا زال=ورثٍ مورث بين كل الفصيله
صدقانهم يحيون باكرام واجلال=وعدوهم يسقونه الحنظليله
قبيلةٍ يفخربها كل رجال=ياحيها ياحيها من قبيله

غيمار

لطامة العايل ولا كـل مـن عـال = يسلم من اللطمـات ويعـز حيلـه