من شفتها بات بعيوني سحرها يوم الخميس = من بعد نص الليل ونجوم السما عيّت تنام
والبدر في وقت اكتماله كان للغيمة فريس = ناوي يخبي نوره اللي إنطفا ما له ملام
ليلة ولا كل الليالي لا تقاس ولا تقيس = كل البلاوي ودعتنا وابتدا يحلى الكلام
واللي سحرني نورها والغالية مصدر رئيس = ليلة ولكني أبد والله ما شفت الظلام
وسط العيون مرايتي في عينها كنت الجليس = أكشف خبايا صورتي داخل دجاها باهتمام
محلى ملامح حسنها غطت على نور ولميس = والصوت لا غنت مثل أنغام وأحلى من مرام
رقة وأنوثة خطوها إن جات ما أسمع له حسيس = والخد لا منها خْجلت أحمرت أسراب الغمام
كان العروس جنونها والنبض في قلبي عريس = يعزف لها مقطوعة الأشواق وإيقاع الغرام
ولون القميص اللي نبت في صدر أرض مرمريس = ودي أغطي عشبها وأفرش لها أحضاني وأنام