السلام عليكم ورحمة الله وبركاته

بدايةً أعتذر عن الغياب..
ويعلم الله أن لكم في القلب ما لكم..
اليوم أخترت لكم من (شعر المعاناة الغزلي) أو شعر (الغزل المعاناتي)..
والذي يجمع بين: الغزل.. والمعاناة..
إليكم..

صلوّا على محمد..

بديت أسهر ليلتي.. والشارع الشرقي سكون..=ولاّ الجنوبي لا نظرته.. بان همّي وتعبي..
.
لأني عرفتك فيه يا روح الأماكن والسنون..=في صورةٍ كنّك تقول اليوم هل من معجبي؟
.
والصورة اللي باقية منّك بقلبي.. يا جنون..=كنّك تقول لها الملا.. مسكين يا من لدّ بي..!
.
الصورة اللي لزّمت تبقى وسط صدري قرون..=والنور.. حتى النور.. لا أقبل.. تجي معه تحبي!
.
ماني موصّف صورتك.. لأن العقل .. مهما يكون..=ملزوم له قدرة وحدّ يطيح دونك يتعبي..!
.
يا من جعلت الكون ماله في حياتي أي لون..!=يا ملخبط حروف الهجا.. والشرق عقبك مغربي..
.
يا من جعلني عالم بعلم اللغة.. وكل الفنون..=وعلم المعاني والبيان.. وكل فصاحة يعربي!
.
كله على شان أحمل الألفاظ يمّك يالحنون..=وأفصّل الألفاظ قدّك.. في مقامك.. يا ظبي!
.
ليتك تجي يمّي عقب طول التجافي والسنون...=وأسلّمك قلبي غلا.. وأقول أبشر وشتبي؟!!!