الألف أحب الشعر وأهواه وأهواك=سبحان من هو بين الأجناس سوّاك
وسبحان من هو في سما الروح ضوّاك=إنتي حياة الروح لو هي شقيّة
والباء بنيت جدار سور المحبة=يحيط بيتٍ يسكنه من نحبه
اللي علينا فارضٍ كل حبه=طاغي محبة ما يحب الأذيّه
والتاء تولعنا بشوف الجميلة=والموت لاصارت جميلة وأصيلة
تاخذ شباب القلب وتهد حيله=شمس برقت من قبل عيد الضحيّة
والثاء ثلاث أيام لي من عرفته=وضاعت علومي يابشر يوم شفته
وصفه لو أبدع لا حشى ما وصفته= كامل يكمّل حسنه الجاذبيّه
والجيم جرح الروح مستلقط الروح=مافيه غير الشعر آمنه وأبوح
أبوح بوح اللي من البعد مجروح=عز الله إن الحب شر وبليّة
والحاء حمدت الله إني سعودي=زودي علي بالجرح يابنت زودي
ما للوفاء عند السعودي حدودي=طبع الوفاء من مولده للمنيّه
والخاء الخواتم زاهياتن يدينك=مابي قسى . عطني حنانك ولينك
يازين وصل الروح بيني وبينك=المعذره لو كان فيها خطيّة
والدال درب الحب ماهو بمأمون=ياكم عاقل باع عقله لمزيون
عاقل ويمشي بين هالناس مجنون=خوفي يكون الحب جاني عليّه
والذال ذقت المر يا شين دنياي =ذقته وأنا خايف من الذي جاي
ما للرجل في عتمت الوقت أي راي= والذيب ذيب ولا يتنطّح رديّة
والراء رمى قلبي حسينٍ مدلّع=ما ألوم قلبي في هواهم تولّع
الخافق اللي مع هوا البيض شلّع=كتبتها لو المشاعر خفيّة
والزاء زهمت القاف جاني يلبّي=يوم العشق والشوووق واللي لعبّ بّي
صبّي فناجيل الغلا إيه صبّي= يازين فنجالي من الشاذليّة
والسين سلوة خاطري شوف خلّي= لا يا بعد حيّي وميتي ومنّ لي
بين البشر زايد حلاه إمتعلّي = بالطيب هو بالطيب مافيه زيّة
والشين شانت حالتي يوم فرقاه=فرقى الولايف مابه احدِ يتمنّاه
زين اللّقى . وش ما بقى . منه عفناه = أبو يدينٍ ناعماتٍ طريّه
والصاء صباح العيد مالي انا عيد = حزنٍ علي كل عيد هو لازم يعيد
ماهو تشاؤم أذكر الحزن بالعيد = عيدي حزن مشرووع بالأولويّة
والضاء ضما قلبي على شوفك اليوم = حيّيت ياراع الوفاء شرع وسلوم
عساك سالم والسلامة معك دوم = ياللي لك إشواق الغلا دوم حيّة
والطاء طلبت الله منشي السحايب = يرد من هو مودع القلب ذايب
شبّيت نارٍ وسط جوفي لهايب=مالي على نزح الغلا مقدريّه
والظاء ظلموني ربعي وكل ناسي = وماني أنا والله للزين ناسي
لا يقلقك عذّال صاحبك راسي = راسي لو إن الوقت جاير عليّه
والعين عيّت عيني تشوف غيره = طبع الوفاء بعروق جسمي مسيره
لو الخواطر من فراقه كسيره = وصله عقب فرقاه أعظم هديّه
والغين غابت ضيقتي يوم لقياك = شفنا السعاده والفرح يوم شفناك
عسى الولي من كل مكروه ياقاك = يا أطيب بشر طيبتك صارت سجيّه
والفاء فرح يوم التلاقي غمرني = حي الله اللي لا لمحني شكرني
اللي يقول الوقت جار وقهرني = كلّن يقول اليوم دنيا دنيّة
والقاف قلّي وإختصرلي بإيجاز = ليه إختلافك؟. ليتك اليوم نجّاز
لا يطربك هالروك لا يعجبك جاز :^)= ترا الربابة مالقينا حليّة
والكاف كلّي عاشقٍ فيك كلّك = قلّي أنا وشلون أقدر أملّك؟
إنت شفت قلبي؟ إيه هذا محلّك = متعوّدن منك الوفاء يا وفيّة
واللام لا تنسى سواليف قلته = وهموم وقتك من حياتك نقلته
إنته عطيتن شي وانا قبلته = ومن الفرح جاوبت لي سامريّة
والميم انا ملّيت طول إنتظاري = خلاص أنا قررت هذا قراري
بأحجز وأجيكم مع دجى الليل ساري = بس إنتظرني. ونار الأشواق حيّة
والنون ناموا بس انا صرت قاعد = يوم النظر لنجوم هالليل صاعد
وش حالتي لو غالي الروح باعد؟ = ترجع شقيّة لو كتبت الوصيّه
والهاء همومي وسط روحي تـتالت = هالت وسالت هالمدامع وشالت
شالت حزن وأوقات الأحزان طالت = وتبقى بهالدنيا قلوبٍ نقيّة
والواو والله ماهويتك لأجل شي = قربك مناة القلب ألقى به الفي
عطشان بس الروح ما يرويَه مي = لا هي رديّة ولا بحقّك خطيّة
والياء ياليت الحظ جابك نصيبي = لانك دواء قلبي وداي وطبيبي
همّي غدابي وحيل منّي قريبي = شاعر و . هم القلب صاير خويّة