الوصل عيدك يالقلوب المواليف=والهجر والفرقى عدوّين الاحباب

ياويش عذر الّلي له ايّام ماشيف=اقفى ولا ادري ويش عذره والاسباب

غروٍ جماله فاق كل التواصيف=عليه نظرات المخاليق تنساب

كنّه لحاله فوق روس المشاريف=والبيض من دونه مجاريح واغراب

يزهى المدينه وان وطت رجله الرّيف=تزهر بساتينه نواوير واعشاب

واليا حكى كنّه يزيد السّواليف=ذوق وعذوبه وابتسامات واعجاب

له نظرةٍ لا سلّها وقعها سيف=القلب منها يشتكي مابعد طاب

ربيع لا جارت لظى الشمس بالصيف=ومدهال لا شحّت سما كل الاصحاب

شوفه يريح من العنى والتّكاليف=وضحكة حجاجه تبري جروح منصاب

احب لاجله واكره احيان وآعيف=واقدّره واحسب لشرهاته حساب

هذاك احبّه دون لادري ولاكيف=وتوّي عرفت ان الهوى حيل غلّاب

احب لاجله واكـره احيـان وآعيـف
............ واقدّره واحسـب لشرهاتـه حسـاب

شاعرنا المبدع / حسين النجراني

صح لسانك وانا أخوك

عز الله إنها قصيدة

أبيات قمة في الجمال والروعة

صح لسانك حتى ترضى

ولا تحرمنا جديدك العذب

وتقبل فائق تقديري واحترامي