صـرخـة فـارس عبد العـزيـز
كتبت ياما كتير م الشعر والازجال
أكتب ودرجى زهق من شغلته شيال
وتعبت من ركنتى على رفوف بكره
أحسنلى أبيع الورق وأكسبلى منه ريال
كتبت عن قصتى ويا الحياة مـوال
وكتبت عن وحدتى ف الغربه والترحال
شافوا كتابتى الصحاب وقالولى محلاها
لازم بقى تتعرض ع المسئولين ف الحال
وكتبت عن حبها ياما كتير مواويل
وإزاى أنا قدتها وسط الظلام قناديل
أملى فى يوم إنها ترضى كدا عنى
وتبقى فى دنيتى قمره فى وسط الليل
سمعوا وعرفوا كتير إحساسى وشعورى
قالوا إنى ح أظهر فى يوم واخد بقى دورى
م الشهره والسلطنه وراح يسمعونى الناس
زى ابن عبد الروتين أهو برضه من دورى
قولولى أيه رأيكم يا مسئولين عنا
أمتى النهار ينجلى عن بعض أعمالنا
ولا خلاص اللى وصلوا نسيوا ماضيهم
دول كانوا يوم زينا دول جربوا حالنا