صرخة لأصحابى
ياعيون صحابى ماتبعدوش
مابقتش قادر أحب صاحب
أصحى فى يوم ومالقهوش
مابقتش قادر أعشق قلوب
من غير وشوش
الننى سجناه الرموش
والنظرة ع القد مابتوصلش مطرحكم
سن القلم ما ابتسم من يوم مافارقتوه
مابقاش يزغزغ فـ الورق
رصيت الصور لعينى رصيتها
ولمحت بصتها ولقيتها
عايزة تخرجكم تداعبكم تكلمكم
واحشة عينى لمتكم
فين الهزار . وفين الكركعه فـ الضحك
فين السهر والغنى فين الحكاوى
متغربين عندكم وقلبى متغرب هنا
الغربه نداهه
لما نكون كلنا مع بعضنا ماتغلبناش
أخر كلامى لكم
مش راح نبقى ورق الشجر اللى يطير من أول هزه
إيدى فى إيدكم
نبقى الجذع ونبق جذوره
نبقى الشجرة