[عبدالله الدوسري]

أتودّد لك و تعطيني جلا=أتخلّى عنك هذا مستحيل
ليت تدري ويش عندي لك غلا=ضارب اطنابه بمكنوني نزيل
من قديم الوقت معطيك الولا=و أنت في غيّك و لا تشفي غليل
ذايقٍ في صدّتك شرّ البلا=ضايقٍ صدري من أسبابك عليل
أتشفّق منك لو قولة هلا=لا تخلّيني ترى منْتِب قليل
بين كلّ الناس كنّي في خلا=و أتذلّل لّك و لا ني بالذّليل
شِمْت عن غيرك و عيني للعلا=طابعٍ نفسي على الصّبر الجميل
ما أذكر إني قلت لك لولا و لا =بسّ في فرقاك زاد اللّيل ليل
خاطري ما مرّةٍ عنّك سلا=ارحم اللي في رجا وصلك قتيل
عيشه بليّاك ما فيها حلا=لا و لا لي صوب نسيانك سبيل