آخـر رسالـة ودي تكتـب يمينـي
قبل الرحيل المر قبـل الحسايـف
ارجوك ياعذب اللمـى سامحينـي
ما دام انا من سيرة الحب خايـف
ناديت من قلبي عسـى تسمعينـي
لاتحسبيني يـوم صديـت عايـف
صوتك يسبـب مشكلـه صدقينـي
حتى ولو بين القلـوب الولايـف
اقولهـا مـن جـد بينـك وبينـي
ياهو مصيبه همس ذيك الشفايـف
لو تنطقي حرفين تسحـر فطينـي
وش لون عاد اهل العقول الخفايف
حسنك سلب عقلي وبيـح كنينـي
ماعدت غيرك ياريش العين شايف
الزين لفك مـن شمـال ويمينـي
قليل في حقك حسيـن الوصايـف
مافيك عيب وكل مابـك حسينـي
فيك الحلا والحسن طاغي وكايـف
طلبت ربـي فـي فراقـك يعينـي
ماعاد بي حيـلٍ يطيـق الكلايـف
وان كان جيتك جنبـي واتركينـي
لاني اعرف القلب يمـك مهايـف
لاتذكريـن الحـب لاترحميـنـي
خلينـي اصبـر تاليتهـا خفايـف
حتى بمنامـي حاولـي ماتجينـي
ردي طيوفـك لاتجينـي ردايـف
واذا صحيت انسى عناي وحنينـي
واحاول انسى حب ناب الردايـف
حتى ولو جـوي تعكـر ..يزينـي
واعيش جوٍ مثل جـو المصايـف
هـذا قـراري راضـيٍ مايجينـي
من عقب عديت الطوال النوايـف
شم الجبال اللي حجاهـا حصينـي
عديتهـا وهمـوم قلبـي لفايـف
في مرقبي راجعت ماضي سنينـي
واخذت عبره من ليـالٍ طوايـف
درب الهوى يابنت مالـه ضمينـي
ياكثر مابه مـن علـوم وطرايـف
في سيرة العشـاق سـرٍ دفينـي
وهمومهم باقصى الضلوع النحايف
نهارهـم مابيـن شـوق ونينـي
وليلاتهم مابيـن ساهـر وحايـف
حال الهواوي مثل حال السجينـي
دايم على خـده دموعـه ذرايـف
ابيـك والله وادري انـك تبينـي
بس اجزمي خلاص ماني برايـف
بودعـك يافاتـنـي واذكريـنـي
اذا قريتـي هاجسـي بالصحايـف
ارجوك يابنت الحـلال اعذرينـي
وانسي مع الايـام ماكـان طايـف
يكفـي دلــع بالله لاتحرجيـنـي
قلت الك انا من سيرة الحب خايف.
للمبدع /
عبدالله المرشدي
