عزيل يازين التعازيـل عزيـل
من سله السلال محـدٍ فطـن لـه
وعين تهل الدمع مثـل الهماليـل
عـجـلٍ تهـلـه ذرافٍ ماتمـلـه
مني عليكم ياهـل الـدار تهليـل
عن عين مشفوحٍ ٍ بكـم مشفحلـه
عنودكـم تذبـح بنجـل ٍ قواتيـل
وزلف ٍ تهلل له زهـا مفـرق لـه
ينسف عثاكيل ٍ كما سبّـق الريـل
يغري الى تلنه علـى مفـرعٍ لـه
وزمة نهود ٍ مثل وصف الفناجيـل
فـي لبـةٍ لـه توهـا مستقـلـه
وبدر البها غرب لها في دجى الليل
وشمس الضحى تنماز عن غرّة ٍ له
وتغري بزغروت الهوى والهلاهيل
ويمشن له كرهن ويقفن رضى له
وإلى قعد مع راجسـات الخلاخيـل
فالزيـن لـه كلـه لحـاف ٍ وكلـه
ونطق ٍ تسلسل منه سحـرٍ أبابيـل
وملحٍ يتله مـن عجاريـف دلـه
يسلي الخليل بغنج دعـج ٍ مغازيـل
يرمش ويغـزِل لـه ومـره يتلـه
أواااه لوهي بالصـور والتماثيـل
لا خذ تماثيله معـي وامتثـل لـه
أحيا بهرجه لي وحسـن التعاليـل
واتلف بهجرانه وانا مصخـرٍ لـه
وش عندكم في طلب مثلي إلى قيل
من هو طريحٍ له عسـى ماتشلـه
إن مـت ياطلابـة الثـار تحليـل
أنتم وأنـا ياعزوتـي فـدوة ٍ لـه
سالوا غريرٍ بالهوى مابعـد سيـل
قولوا على أية مذهـبٍ يستحلـه ؟
قالوا نراك موجّل ٍ , قلـت ماقيـل
قالوا عليل ٍ , وقلـت مافيـه علـه
قالوا علامك تالف ٍ , قلـت بهليـل
من صارم ٍ من بين عينيـه سلـه
لو إن جرحي من عْـداة ٍ مقابيـل
ماحـل فـي قلبـي هيـام ٍ يتـلـه
لكن جرحي بالخفا مـن معاسيـل
طفل ٍ سطا وانهل صوابـي وعلـه
لا ياطبيبـي دلــك الله تدلـيـل
داي الخفي ودواي من مبسم ٍ لـه
لكن مابيدي ولا فـي يـدك حيـل
ذا شِنْ كِتب للعبد ماهو هوى لـه
ياسيدي زرني تراني مـن الويـل
وجل ٍ ولي باقصى حشاي الف عله
قلبي عزب سرحه بليـا محاصيـل
منكم وانا لي عندكـم مرتـع ٍ لـه
قالوا وصال الشوق هيل ٍ بلا كيـل
ويَدْهونِنِي به ليت من يتصـل لـه
وأنا ومن نـزل تبـارك وتنزيـل
ماشفت منـه إلا العنـا والمذلـه
شوقي بخيل وسايله مابعـد نيـل
إالا الهفا معه الجفـا مـردفٍ لـه
نظيف عرضٍ عن هل القول والقيل
وله البرا مـن واهـيٍ مستحلـه
ياما عنوا له ملحفيـن المراسيـل
مني وغيري قوم " رح له وقل له "
وردت طوارشهم هبايـا مفاشيـل
ماحصلوا غير التعب كاسب ٍ لـه !
محمد القاضي