يارسول المحبه خذ كتاب الغرام
........... وصّله ديرة اللي فارقتني شهر
قلّها اني حزين .. وعفت حلو المنام
............ عايشٍ بين هم .. وبين حزن .. وقهر
يوم هلّت عيوني دمعها ماتلام
............ اسهرتني وأنا مانيب يم السهر
عذّبتني وتعذيبي عليها حرام
............ والدموع الشقيه فوق خدي نهر
جيت ابا اوصف شعوري مير ضاع الكلام
............ همت في حسنها الجذّاب طول الدهر
وشفت لي حلم وين امفسّرين الحلام
............ شفت بستان من شافه دهَشَ وانبهر
لودخل فيه كافر كان صلّى وصام
............ واسلم اقبال ربعه والقرايب جهر !
الفواكه بوسطه تشكي الازدحام
............ كل نوعٍ بزينه وبحلاه اشتهر
جالسٍ به لحالي يوم حل الظلام
............ آتمشّى وأنا آكل لين وقت الظهر
ويش تفسير حلمي بالوفا والتمام !
........... دام قلبي على ذيك الهنوف انصهر
واهدها يارسول الحب مني سلام
........... مع تحيه تفوح بريح ورد وزهر
وكان هي بادلتني بالغلا والغرام
........... قل لها وش نوت بي عقب غيبة شهر !