[مبارك بن مسفر]

السلام عليكم ورحمة الله جميعا

في صباح هذا اليوم كنت جالس في مكان ماء وكان بجانبي أحد الأخوة الذي يظهر عليه علامات الحزن بشكل ملحوظ ...فأشفقت عليه ...ثم سألته عن السبب فأخبرني انه متعب واصابه الوسواس وياتيه كوابيس .التي تمر ببعض الناس في هذا الوقت...وما أكثرهم

اترككم مع القصيد التي تعبر عن نفسها ...

جلست مع رجل وطاولنـي بصمـت=وحسيت كن الرجل ضايق ومضغوط
وقربت يـم الاجـودي ثـم سلمـت=ورد السلام بصوت بالحزن مخلـوط
ثم قلت له يابن العرب لـو تكرمـت=احس مانته يابن الاجـواد مبسـوط
قال الحقيقة باخبرك كانـك اقسمـت=سري تحفظه واسمي يصير مغطـوط
نومي قليل وبعض الاحيان لا نمـت=اشوف شي مرعـبٍ ثمـه ممغـوط
واظنّـه الهامـور لـو ماتوهـمـت=في كل نومت ساعة...منه ممسـوط
قالوا تساهم بعت ماملـك وساهمـت=وحمّلت نفسي فوقها ديـن وقسـوط
ورسمت لي مستقبل(ن) زين وحلمت=وقبلت مافيها مـن بنـود وشـروط
ثم اشتريت وبعت وربحـت وغنمـت=وعن واجباتي صرت مُشغل ومشطوط
من عقب مانـي بالوناسـة تنعمـت=أصبحتنا بمؤشـر السـوق مربـوط
وبلحظة قشـرا توقضـت وعلمـت=واليا المؤشر صار في القاع محطوط
واتعِبت من وضعي ومليت وسئمـت=واحس كني يابن الاجـواد مزنـوط
قلت اعتذر لك من مضايقك وفهمـت=انك خسرت وصرت بالسوق ملهـوط
ماتدري انك يوم ضاربـت واقدمـت=ان المضارب بين شافط ومشفـوط؟
بس احمد الله دامك بخيـر وسلمـت=غيرك يموت ..وكان مامات مجلـوط

أخوكم/مبارك بن مسفر