[خليل الشبرمي]

.

يا كاغد القرطاس خلّ الزاج=ينثر شعوري واخر انتاجي
دام المتيّم موج بوحه هاج=وعسعس عليه الليل وانساجي
خلّه يفضفض لو لحقْه احراج=وسرّه تعدّى «ظَلْم» و«سواجي»
حندس ظلام ارهق فتيل سراج=يرجي شعاع الصبح ينباجي
ودمع الحزين ان هلّ هلّ ازواج=من معصرات الهمّ ثجّاجي
بيّح سدودي مترفٍ مغناج=وصفه يعجّز كل هرّاجي
حلو النبا حبّوب طلق حجاج=عذب اللمى والخد لعّاجي
شمس النهار بوجهه الوهاج=وليل الدجى مجدوله الداجي
وخنجر «ذياب» وقسوة «الحجّاج»=وحكمة «اياس» بطرفه الساجي
وجنه ونار وجلنار وعاج=وملحٍ فرات وعذْبٍ اجّاجي
والقيروان وقابس وقرطاج=و«مهد الذهب» و«عيون الافلاجي»
والجمر والجمّار والديباج=بين الجبين وجيده العاجي
قلعة جمال محصّنه بابراج=فيها يهاب ويامن اللاجي
وعرش الجمال اليوسفي والتاج=حاشه بلا تصويت واحراجي
له نوق شوقي زرفلن افواج=كلي ظما والزين هدّاجي
والعمر ساعه والدروب فجاج=والله يحقق مارجا الراجي
لولا الرجا ما حجوا الحجاج=ولا فكّر المسجون بافراجي
والحرب كرّ وفرّ واستدراج=والحب حربٍ مابها ناجي
وش خج قلب «فهيد بن مجماج»=وخلا «خليل» يهيم ويناجي
الزين يذبح يالله المخراج=وصد الحبايب موتٍ مفاجي
والوضع ما يحتاج لاستنتاج=شوفه شفاي ووصله علاجي
اقول والا اقول.. ما يحتاج=احسن لي اسكت وارجع ادراجي

وسلامتــــــــــــكم ...

* فهيد بن مجماج هو قائل البيت المشهور :