الشوق من عيني الحزينة تبرّا
وماعاد جاله داخل العين طاري
واسبلت دمع العين من يوم فرّا
يومه قراره قد تحدى قراري
لابارك الله في زمانٍ تجرّا
عليّ والحقني العنا والعزاري
والصاحب اللي بالمراجل يطرّا
عز الله اني خابرٍ به وداري
ماينطح الشدات كود المضرّا
اللي على عسف الصعيبات ضاري
ذقت بحياتي كل حالي ومرّا
مرٍّ ادورها ومرٍّ طواري
تهون لاخانك زمانك وضرّا
الموت لاخانت عيون العذاري
من رحمة الله ما تأبطت شرّا
ولاضقت من ضيفي ولا آذيت جاري
وجدار غيري لاتجمل وذرّا
عز الله انه مايوازي جداري
الخير يثمر يوم تبذله سرّا
واحيان يثمر لا بذلته جهاري
لاصابتك عين المها وش تحرّا
دام انها سهم ٍ زرق دون باري
لبست ثوب العز جوه وبرّا
وقضيت به ليلي البهيم ونهاري
محدٍ من ثياب المراجل تعرّا
ياكود رجلٍ سلم ربعه تجاري
والطعنة اللي صرت فيها مورّا
أهون من طعون القفا والغداري
أحدٍ على الفزعات توّه يقرّا
واحدٍ عليها صار دارس وقاري
والدمعة اللي ناشت الخد حرّا
مدري عليها ليش طقيت طاري
لامن ذكرت همومي اللي تذرّا
عنها خفوقي واحتضنها انكساري
قمت آتنحى عن هلي واتورّا
وزينت انا قهوتي على جال ناري
والشوق من عيني الحزينة تبرّا
وماعاد جاله داخل العين طاري