تعال شفتك ياعشيق الصبايا..
وين أنت ساري تترك الروح للنوح
مادام ربي ساترك بالحنايا..
وش لك بخط نهايته دمع وجروح
صحيح بعض الزين مثل المطايا..
يرخص عليه المال والغير والروح
لكن بعض الزين مثل المنايا...
لن ماذبحك يعرضك لاهب الفوح
وانته جروحك نصف منها برايا..
والنصف الآخر للمقادير مفتوح
عالج جروحك من طعون وشظايا..
ثم بعدها لو تعشق بعقل مسموح
أهم شي تمر قسم الوصايا...
وتكتب وصاتي قبل ماروحي تروح
تدري وش أكبر موت وأعظم بلايا..
الموت لن علقت روحك لاجل روح
مـن آشعار/ طلال المحياوي الجهني