[فواز المطيري]

لله خوف المؤمن اللي يراقبه=الواحد اللي مافرق حرّ ورقيق
ياعالمٍ ماكنت عني حاجبه=يامن تحت امره زفيري والشهيق
ادعوك دعوه عنك ماهي غايبه=ياواحدٍ ماكلّف بما لا نطيق
عبدك بنو عبدك وصبره فاض به=يارب تفرجها عساها ماتضيق
اعوذ بك ياربّ سوء العاقبه= وانك تقـّديني صراطك والطريق
اعيش وقتٍ مافرح من عاش به=ماهو بعايقني ولا يمكن يعيق
بأمرك فقط اليا بغيته داربه=والامر لك اجلال امري والدقيق
ان كان يشربني فلاني شاربه=ماني مقـّيد له ابدّ حرٍ طليق
شاعر ويغرق فالحقايق قاربه=اقرب من عيون الشهاده للغريق
شاعر مدّسم قبل حرفه شاربه=اكبر همومه لا تحاشاه الرفيق
واعظم همومه مايلقّي غاربه=في زمانٍ شاف به مالا يليق
رفيق دربه بالبنآن يشـار به=صيته على ماقالوا يضاهي طويق
في حضرته الخير معه مواكبه=واذا هرج ينشف معه 200 ريق