[حمدان الغيثي - موادع]

إلى من سكنت روح إحساسي .. ثم تمردت و انطفأت روحُها في جوفي ..
إليها هي فقـط .. أقـول و كلّي جـرءة :


(

::×:: استمع للقصيـدة ::×::

)

بانسـاك ياللي حالـفٍ ما تناسـيك = وانكث بوعـدي دامك الوعـد خنتيه
انتي بديتي بالغـدر.. كيف أوْفِيك ؟! = من شب غـدر ٍ يصطلي في تجافيه
لا يا حقيرة بعتي من كان شـاريك = من بعد ما لملـم حلومـه خـذلتيه
لا تحسبيـن انّي بغيـري بهنّـيك = أو إنّ راسي في غيـابك بأوطّـيه
تخسيـن والله كاني عـوّدت أغليك = قلبـي مع الغـدار بعـدك جهلتيه
في كل فرحـة بادعـو الله يشقيك = وضعف العذاب اللي أذوقه تذوقيه
والله لهيجن في البوادي وأعـرّيك = حتى تعرفي شلون عهدك تصونيه

يا خاينة ..
وين النهار بْدنيتك ؟؟
ماكو نهار !!
نصفك غروب..
ونصفك الثاني جمر..
الليل يسكن في تفاصيلك متاهة
والزيف يزرع في شرايينك خرافة
وانتي بأطماعك مريضة
يا محقرك .. !!
تخطّي الكذبة بإيدك ..
وتصدّقيها ..!!
يا محقرك .. !!
قلبي تعوّد ع الغلا ..
ودامك رخيصة بْيتركك ..
ما عدتي نبضه أو حنينه ..
أو طيوره أو نجومه أو قصيدة في يدينه
من يوم أرخصتي المشاعر ..
طاح حظك عند شاعر ..
يا متعسك .. !!
من قال لك :

إنّ القمـر يخجـل يطالع ناظــريك
........................ وانّ الزهر يلقى ربيعه اف بسمتك
وانّ الشمس تترك وهجها بْوجنتيك
........................ وانّ البلابـل تنتشي في حضــرتك

لا مو صحيح ..
لا تصدقي ..
هذا وهم ..
غرهم ملامح زائفة ..
و اغصان حولك وارفة ..
و كم تخدع الألوان .. !!
و تتوّه الأشكال ..
يا ويلهم ..
ما قد دروا ..
إنك مدينة بائسة ..
ما يسكنك غير الثعالب والوحوش ..

لا لا شوارع .. لا نوادي .. لا جسور
........................عتمة اطفأت صبح الحقيقـة بْـداخلك
لو تسكنك لاشباح هجّــت من دهور
........................ يا ورقــة الصبّـار روفـي بْـنـازلك

من يبني صْروحه بْرمل ..
ينقش ع جدرانه الضياع ..
وعشرة بْخيانة ما تدوم ..
كنْها سفينة من ورق ..
تبحر ويغازلها الغرق ..
وانتي انتهيتي بْدنيتي ..
من يوم فكرتي تخوني ..
وجاك الخريف بقسوته ..
وطاحت اوراق الخيانة ..
من معطفك ..
يا خاينـة ..
(
)
::×:: مـ موادع ـوادع ::×::