[ليان]

مساؤكم ورد ...

~ بحوور الشعر ~

عشقي بحور الشعر وأغلي قوافيه=وأعسف معه جزل المعاني وأقوله
الشعر عشق بداخلي ماأقدر أخفيه=توأم لروحي من زمان الطفوله
ربي يحييني وربي يحييه=دام المعاني ذود عندي معقوله
ورثت جزل الشعر وأطيب معانيه=من شايبٍ مرحوم ماغاب زوله
الله يجيره والله إنه يجازيه=بالجنه العظمى يخلي نزوله
بنتٍ تجيب العلم وأيضاً توديه=من لابةٍ تقهر ثمانين دوله
في حزةٍ ماينفع الذل راعيه=يومٍ عبوس وطيب الذكر حوله
ما همّها هرجٍ رديه مساعيه=واللي أقوله والله إني لأطوله
حي القصيد وحي نبضه وطاريه=لا يا ربيع العمر وأجمل فصوله
أكتب وأمحي لين بانت مواريه=وأعلن وصوله عندي أعلن وصوله
غير الورق مالي أنا من أناجيه=لاأظلم علي الليل وأرخى سدوله !!

وسلامتكم ..