القوافي الخجولة

[بروق السحايب]

يالله يــارب الـثـرا والسـمـاوات=ياللي بيدك الكـون عرضـه وطولـه
ياخالق الانسـان .. يامكـون الـذات=ياناصرٍ جنـده .. يامنجـي رسولـه
يامخرج الاحياء من صلـب الامـوات=ياخالـقٍ نفـس البـنـادم عجـولـه
ياجاعـلٍ كـل ماخلقتـه لنـا آيـات=دليـل عظمـت سلطنتـك المهـولـه
اغفـر لمـن آمـن بـأن المناجـات=يطرق بها بابـك .. وعفـوك ينولـه
عبدٍ عبـارة عـن ذنـوب وخطيّـات=ضعيف .. نفسه من ذنوبـه خجولـه
إذا ألمـت بـه يـاربـي الملـمـات=وقّف علـى بابـك .. ونـوّخ ذلولـه
غافل , وغارق في بحـور الملـذات=ربـه هـواه , ومُشتهـاه , وميولـه
ياكثر ماطـوف فـروض وصلـوات=من دون خوفٍ يردعـه , وبسهولـه !
مقصر مع المصحف ومع حفظ الآيات=ونفسه على كسـب الفضيلـة كسولـة
مخلص مع اصوات الموسيقى والآلآت=معازف ابليـس الرجيـم , وطبولـه
ضيّع حياتـه فـي همـوم ومتاهـات=يحسبـه فايـز بالظفـر والبطولـه !
شاعر , وعمره ضاع خلف الخرافات=يفـرح ليـا مـن المـلا صفقـوالـه
يتخيّـل افكـاره لنفسـه عصـابـات=ويأخذ معاها .. ألف صولـه وجولـه
يحـاول يألـف لنفـسـه حكـايـات=حتى لو ان الصـدق ماهيـب حولـه
غزل , ومدح , وفلسفات , وقناعـات=أهم شي ..! يروي عطشْـه وفضولـه
يطوف ليلـه ساهـر العيـن مابـات=يسهر على طـرد القوافـي الجفولـه
وغيره , سهر بين الدعاء والمحاتـات=ودمعه على خده .. ماوقـف هطولـه
عبدٍ عليه من المعاصـي علامـات !!=مـمـا يُبـيـن للخـلايـق ذهـولـه
صار يتمنى .. من كثرهـا اذا مـات=ماينسأل في حينهـا ويـش هولـه ؟!
لكنّ يآلله .. ( هيهـات .. هيهـات )=ماكـل ماحـنـا انتمـنـى نطـولـه
في يوم .. تعلا اصوات وتغيّب اصوات=من شدة الموقف , وكبـره , وهولـه
يومٍ .. تشوف الناس والعالـم اشتـات=صياح , واصوات , ونحيب , ومعوله
في يـوم .. ماتنفـع قبايـل ونعـرات=لا آخو , ولا ابن عـم , ولا حمولـه
ابولهب .. عم النبي .. سيـد سـادات=شف ويش سوابـه هـواه وفعولـه ؟!
هـذا دليـل ان النسـب والعـلاقـات=ماتنجي الانسـان .. مهمـا فعلوالـه
كل البشر .. على اختـلاف الطبقـات=سوا .. غني .! فقير .! رئيس دوله .!
هذا بكى .. وهذاك تبـدو ابتسامـات=وجهه بعـد رضـوان ربـي وقبولـه
الي ضحك مستبشر ( ابما هـوَ آت )=في جنة الفردوس .. مااطيـب نزولـه
نعيـم دائـم , وبسعـاده , وخيـرات=واي شي نفسه فيه .. سهـلٍ حصولـه
موفقـه ربـه لأعـلـى الـدرجـات=هـذا هـو التوفيـق علـى اصولـه
واللي بكى يبكي .. وبالقلب حسـرات=اذا امتثـل .. امـام ربـي مثـولـه
يسأل على عمره , ومالـه , ومافـات=وشبابه , ووقتـه , وفعلـه , وقولـه
تفتح لـه ابـواب العـذاب المسمـات=ومن عذاب الـرب .. مااحـدٍ يعولـه
يـارب ,, اجرنـي ياإلـه السمـوات=ياللي بيدك الكـون عرضـه وطولـه
واغفر لمـن آمـن بـأن المناجـات=يطـرق بهـا بابـك وعفـوك ينولـه

للشاعر ناصر آل صامل

الاخت سراب
بحروفك الماسية نرى الحياة كـ لوحة فنان أبدع الرسم وأجاد
انتقاء اللون فزرع على ذلك البياض ألواناً تبهج النفس
تقبلي مروري
تحياتي

[( حايره )]

مناجاة لرب الكون

ومحاسبة للنفس


سلم القائل والناقل

:rose:

[لون الثلج]

:

والله قصيده روعه

يعطيك العافيه

سرااب

من جد اختيار مميز

لك كل الح ــب
.

[مزون المحمد]

سراب يعطيك العافية على نقل قصيدة الشاعر الشاب ناصر آل صامل

أثبت نموذج جميل للشاعر المتوازن والذي يعطي لمحاسبة الذات أهمية في قصائدة

بالتوفيق له يارب




دمت بألف خير

[محمد محفوظ]

جزاك الله كل خير

وجعلها في ميزان حسناتك

ونفع بها الجميع
وفى أنتظار جديدك فلقلمك مقدار الاحترام والتقدير

[محمد الفرحان]

.

.

صح لسان قائلها ولاهنتِ اختي

سراب على وضعها هنا ..

.

.

لكِ مني فائق التقدير والاحترام

[فهد الدباسي]

سراب


ألف شكر لك على هذا الموضوع الرائع


جزيتي خيراً